Tökur á myndinni Vaxandi tungls fara að mestu fram á Suðureyri. mynd/bb.is

Tökur á kvikmyndinni Vaxandi tungl hefjast innan skamms á Suðureyri. Vonir aðstandandenda myndarinnar gera ráð fyrir snjó og vetrarhörku á meðan á tökum stendur. Ef veðurguðirnir verða ekki hliðhollir treysta kvikmyndagerðarmenn á Suðueyri á snjóframleiðsluvél skíðasvæðisins á Ísafirði. Frá þessu er greint á vef myndarinnar, ontrack.is. Verið er að innheimta hlutafé þessa daga og er stefnt að því að því verði lokið um miðjan mánuðinn.

Um er að ræða fjölskyldumynd sem byggir á sannri, rammvestfirskri sögu úr nútímanum. „Gömul kona deyr í litlu sjávarþorpi. Eldri sonur hennar býr á staðnum ásamt fjölskyldu, en yngri sonurinn býr í Reykjavík með konu sinni. Lát gömlu konunnar vekur upp átök milli bræðranna. Óvænt þungun flækir málin enn frekar. Kemur þá til skjalanna yngsta dóttirin, augasteinn ömmu sinnar. Hún finnur fyrir nánd gömlu konunnar, afræður að bjóða örlögunum byrginn og berjast fyrir sínu,“ segir í lýsingu á efni myndarinnar.

Tökumenn myndarinnar verða Jóhannes Jónsson og Guðmundur Bjartmarsson. Hljóðið verður í höndum þeirra Hrólfs Vagnssonar og Péturs Hjaltested. Með aðalhlutverk í myndinni fara Elva Ósk Ólafsdóttir og Pálmi Gestsson ásamt Birtu Maríu Gunnarsdóttur. Fjórir ungir leikarar voru valdir úr áheyrendaprufum til þess að leika í myndinni en það eru Ástrós Valsdóttir frá Suðureyri og Ísfirðingarnir Birta María Gunnarsdóttir, Sunna Karen Einarsdóttir og Svanur Pálsson. Auk ungmennanna hafa leikararnir Ársæll Níelsson, Elfar Logi Hannesson og Rakel Dimar, sem er dönsk, verið ráðin til að leika í myndinni. Mugison mun síðan semja og syngja titillag myndarinnar.