Nærmynd

Eftir Gunnhildi Örnu Gunnarsdóttur gag@mbl.is

Stjórn LÍN, Lánasjóðs íslenskra námsmanna, hefur ákveðið að þeir sem eiga í verulegum greiðsluörðugleikum geti fengið frystingu námslána til þriggja ára á þeim gjalddögum sem verða á þessu ári og til ársins 2012. Námsmenn þurfa að fara í mat hjá Ráðgjafastofu heimilanna áður en þeir fá frystinguna eða að koma með yfirlýsingu þess efnis frá viðskiptabanka sínum.

Guðrún Ragnarsdóttir, framkvæmdastjóri LÍN, segir þetta gert til að koma til móts við óskir og þarfir greiðenda. Mjög erfitt sé að meta hve margir þurfi á úrræðinu að halda, því ekki liggi fyrir nákvæmar tölur um hve margir þeirra sem hafa sóst eftir greiðsluaðlögun eða séu með allsherjarfrystingu lána hjá bönkunum, séu einnig með námslán: „En við teljum að það gætu orðið um þúsund manns.“ Hún gerir ráð fyrir því að þessir einstaklingar séu nú þegar að nýta sér  úrræði hjá sjóðnum.

Guðrún segir að 1.890 manns hafi sótt um undanþágur frá greiðslum námslánanna. „Þetta eru þeir sem uppfylla þau skilyrði að vera í námi, er atvinnulaus, glímir við örorku, veikindi eða ummönnun barna.“ Nú sé hins vegar einnig möguleiki á úrræðum fyrir þá sem glími við mikla fjárhagslega erfiðleika án þess að búa við þessar aðstæður.