mbl.is/Ómar

Seðlabankinn hefur tilkynnt Fjármálaeftirlitinu um meint brot 28 lögaðila á gjaldeyrislögum í kjölfar þess að lög um gjaldeyrishöft voru sett undir lok ársins 2008. Þetta kemur fram í svari efnahags- og viðskiptaráðherra við fyrirspurn á Alþingi.

Ásbjörn Óttarsson, þingmaður Sjálfstæðisflokks, spurði ráðherra til hvaða aðgerða hafi verið gripið og til hvaða aðgerða verði gripið af hálfu stjórnvalda vegna þeirra meintu brota á gjaldeyrisreglum sem nú eru til skoðunar. Jafnframt spurði Ásbjörng hvað sé unnt að gera til að koma í veg fyrir frekari brot á gjaldeyrisreglum.

Í svarinu segir, að fjármálaeftirlitinu beri að kæra meiri háttar mál til lögreglu samkvæmt lögum um gjaldeyrismál en minni háttar málum ljúki stofnunin með álagningu stjórnvaldssekta eða gerð sátta.

Þá segir að reynslan hér og í öðrum löndum sýni að mikilvægt sé að reglur um gjaldeyrismál séu í stöðugri endurskoðun þegar jafnvíðtækar hömlur séu á slíkri starfsemi eins og raunin er hér á landi. Til að koma í veg fyrir brot á gjaldeyrisreglum sé því mikilvægt að til staðar sé öflugt eftirlit og að reglur um gjaldeyrismál séu bæði sveigjanlegar og auðveldar í framkvæmd.

Tekið er fram að svar ráðherra byggist á upplýsingum frá Fjármálaeftirlitinu þar sem Seðlabanki Íslands hefur enn ekki svarað ráðuneytinu þrátt fyrir töluverða eftirleitan.