Skotvís undrast vinnubrögð við gerð verndaráætlunar Vatnajökulsþjóðgarðs. mbl.is/RAX

Stjórn Skotveiðifélag Íslands (Skotvís) undrast þær tillögur sem liggja fyrir í tillögu að verndaráætlun fyrir austursvæði Vatnajökulsþjóðgarðs. Þar er lagt til bann við veiðum á hreindýrum, gæsum og rjúpum á ákveðnum svæðum innan þjóðgarðsins.

Þá gagnrýnir stjórn Skotvís vinnubrögð við gerð tillagnanna og skort á samráði. „Skýrsluhöfundar hafa ekkert samband haft við viðeigandi hagsmunaaðila, í þessu tilfelli Skotveiðifélag Íslands, þrátt fyrir að lagt sé til að gengið sé á rétt skotveiðimanna með tillögunni. Það bendir til þess að viðunandi hagsmunaaðilagreining hafi ekki verið unnin af skýrsluhöfundum,“ segir m.a. í ályktun stjórnar Skotvís.  

Tillagan að verndaráætlun Vatnajökulsþjóðgarðs var kynnt á fundi þann 11. mars sl. á Hótel Héraði. Skotveiðifélagi Íslands var aldrei tilkynnt um fundinn.  „Það er athyglisvert þar sem fram kemur á heimasíðu Vatnajökulsþjóðgarðs að svæðisráð, sem ber ábyrgð á tillögunni, verði á staðnum til taka á móti ábendingum og athugasemdum varðandi drögin að verndaráætluninni.

Miðað við þetta má draga þá ályktun að skýrsluhöfundar hafi ekki kært sig um athugasemdir frá skotveiðimönnum og þeirra hagsmunasamtökum,“ segir í ályktun stjórnarinnar.

„Stjórn Skotveiðifélags Íslands leggur til að textinn í kafla 11.3 í tillögu að verndaráætlun fyrir austursvæði Vatnajökulsþjóðgarðs verði felldur út í heild sinni og í staðinn greint frá því að hefð sé fyrir veiðum á svæðinu og þeim skuli haldið í sama fari og var áður en umrætt landsvæði varð að þjóðgarði.“  

Ályktunina í heild má lesa á heimasíðu Skotvís.