Stjórnendur Samherja kynntu stöðu fyrirtækisins á fundi með starfsfólki sínu á Dalvík í dag.

Samherji hefur ákveðið að lengja sumarlokun í frystihúsi fyrirtækisins á Dalvík úr 3  vikum í 8. Ástæðan er „ítrekaðra tilfærslu stjórnvalda á aflaheimildum frá stærri skipum til minni,“ eins og segir í fréttatilkynningu.

Stjórnendur Samherja héldu fund með öllu starfsfólki sínu á Dalvík í dag sem eru um 150 manns.   Auk þeirra voru boðnir  á fundinn fulltrúar samstarfsfyrirtækja Samherja og verkalýðsfélagsins Einingar Iðju.
Boðað var  til fundarins til að fara yfir landvinnslu Samherja á Dalvík í tölum og myndum, kynna starfsemi Samherja hf., kynna áhrif tilfærslna aflaheimilda af stærri skipum til smærri á rekstur Samherja  á Dalvík og horfur til framtíðar.

„Á fundinum var starfsmönnum landvinnslunnar á  Dalvík tjáð að engar uppsagnir starfsfólks stæðu fyrir dyrum.  Hinsvegar væri nauðsynlegt lengja sumarlokun í frystihúsinu úr 3  vikum í 8 vegna ítrekaðra tilfærslu stjórnvalda á aflaheimildum frá stærri skipum til minni.

Sem dæmi um áhrif þessar stjórnvaldsaðgerða má nefna að skerðing Samherja í bolfiski eingöngu vegna strandveiðanna á þessu ári eru 450 tonn.  Þessar aflaheimildir hefðu dugað til að reka frystihúsið í einn mánuð í viðbót.   Strandveiðarnar  skiluðu í heild  176 tonnum á land á Dalvík á síðasta ári.“

Launakostnaður Samherja á Íslandi árið 2009 var  4600 milljónir þar af voru  3200 milljónir vegna  starfsmanna búsettra á Eyjafjarðarsvæðinu.
Samherji keypti vörur  og þjónustu í Eyjafirði  fyrir 1830 milljónir og  veitti styrki til íþrótta  og ýmissa félaga  fyrir  70 milljónir.
Samtals greiddi félagið því 5000 milljónir til fólks og fyrirtækja í Eyjafirði árið 2009.

„Miðað við óbreytta stefnu stjórnvalda varðandi tilfærslu aflaheimilda milli útgerðarflokka og fyrirhugaða fyrningu  er fyrirséð að starfssemi Samherja á Íslandi mun dragast saman og störfum í Eyjafirði fækka,“ segir í fréttatilkynningu.