HR-dagurinn er haldinn hátíðlegur í dag í nýbyggingu Háskólans í Reykjavík í Nauthólsvík. Þetta er í fyrsta sinn sem skólinn opnar upp á gátt og býður þjóðinni í heimsókn en dagurinn hófst kl. 9 í morgun með skattaráðgjöf laganema.

Laust fyrir hádegi stungu nemendur, starfsmenn og almenningur sér til sunds í Nauthólsvík og slökuðu því næst á í heitum potti við Ylströndina. Því næst var boðið upp á gönguferð um Öskjuhlíðina en kl. 12 hélt rektor HR, Ari Kristinn Jónsson, ávarp. Að því loknu söng gospelkór skólans.

Margvísleg dagskrá er í boði í dag. T.d. verður sjálfvirkur kafbátur prófaður og eðlisfræðingar tækni- og verkfræðideildar láta hárið rísa á fólki í háspenntu atriði þar sem neistar á milli manna. Það er notaður svokallaður Van de Graaf rafall til að safna rafhleðslu í stóra kúlu. Rafhleðslan býr til sterkt rafsvið sem má nota til að búa til allt að 40 cm langa neista, til að láta áldiska takast á loft og til að láta hárið rísa á fólki.

Boðið verður upp á skoðunarferðir um nýbygginguna, námskynningar, körfubolta-, fótbolta- og fimleikakennslu auk þess sem sjálfvirki lestrar- og sýndarkennarinn verður kynntur. Þá verða í boði margvíslegir fyrirlestrar.

Þá verður HR-áskorunin sem er úrslitakeppni í hönnun og smíði eggjavörpu en varpan á að geta kastað eggi frá vítalínu körfuboltateigs í gegnum körfuna þannig að það lendi óbrotið. Að auki verður keppni í súlubroti þar sem nemendur í tækni- og verkfræðideild keppa í því að brjóta 4 m háa trésúlu.