Sala nýrra bíla er heldur að glæðast í heiminum, eftir kreppuna. ap

Bílaumboðin verða með opið hús í dag, þar sem meðal annars verður hægt að reynsluaka metanbílum, prófa vistaksturshermi og skoða fágæta bíla. Bílavor 2010 er yfirskrift þessa átaks sem haldið er að undirlagi Bílgreinasambandsins og flestra bílaumboða landsins.

Átakið miðar að því að efla umræðu um bílamarkaðinn sem verið hefur í lægð á undanförnum misserum. Lögð verður áhersla á fræðslu og fróðleik þar sem dregið verður fram mikilvægi bílgreinarinnar og þess að eðlileg endurnýjun eigi sér stað í bílaflota landsmanna, eins og segir í fréttatilkynningu.

„Síðastliðin tvö ár hefur áhugi fólks á því að kaupa nýja bíla verið mjög lítill, enda aðstæður í efnahagsmálum erfiðar,“ segir Özur. „Árin þar á undan var mikil og nánast óhófleg sala á nýjum bílum. Hins vegar þarf bílafloti landsmanna að endurnýjast reglulega og núna er meðalaldur íslenskra bíla 10,2 ár. Okkur reiknast þar til að endurnýjunin þurfi að vera 10 til 12 þúsund bílar á ári. Fólk hefur verið að færa sig yfir í notaða bíla og nú er svo komið að bílasölurnar vantar orðið bíla til endursölu. Mönnum ber núna saman um að eitthvað sé að glæðast yfir viðskiptum."

Hápunktar Bílavors 2010 verða þrír laugardagar fram í maí, einn í hverjum mánuði. Fyrsti opni dagurinn verður eins og áður sagði í dag. Þá verður lögð áhersla á umhverfismál og þá miklu breytingu sem orðið hefur í eldsneytiseyðslu og útblæstri bíla síðustu tíu ár. Sá næsti verður laugardaginn 10. apríl og þá verður litið á þróunina í öryggisbúnaði bíla síðustu árin. Þriðji og síðasti opni dagurinn verður svo laugardaginn 15. maí og þá verður megináhersla lögð á þjónustuna í bílgreininni, hvernig tækninni hefur fleygt fram og fyrirtækin lagað sig að því með menntun og tækjabúnaði.