Bragi Björnsson er nýr skátahöfðingi Íslands.

„Gildi skátastarfsins falla aldrei úr gildi enda hefur þáttaka í starfinu aukist talsvert á síðustu árum," segir Bragi Björnsson sem kjörinn var Skátahöfðingi Íslands á Skátaþingi sem lauk í dag. Bragi fékk 49 atkvæði þegar kjörið var í embættið, einu fleira en mótherji hans.

Hrólfur Jónsson sviðsstjóri hjá Reykjavíkurborg og áður slökkviliðsstjóri höfuðborgarsvæðisins fékk einu atkvæði færra en Bragi sem tekur við embættinu af Margréti Tómasdóttur sem verið hefur skátahöfðingi undanfarin ár.

„Fólk gat valið milli annars nýrra áherslna ogsvo þeirrar stefnu sem fylgt hefur verið síðustu árin," segir Bragi sem hefur verið aðstoðaskátahöfðingi. Hann er 42ja ára og hefur starfað innan skátahreyfingarinnar í 30 ár.

„Ég byrjaði tólf ára í skátafélaginu Ægisbúum í Vesturbænum í Reykjavík, sem seinna þróaðist út í að ég tók að mér foringjastörf ýmiskonar,“ segir Bragi sem í krafti embættis síns tekur við Silfurúlfinum, en á hann eru letruð nöfn allra þeirra sem gegnt hafa embætti Skátahöfðingja Íslands til þessa dags.

Bragi starfaði lengi sem yfirlögfræðingur Skattrannsóknarstjóra ríkisins en undanfarin ár hefur hann sinnt lögmennsku á eigin stofu. „Skátastarfið hefur gert mér ákaflega gott. Með því öðlaðist ég til dæmis sjálfstraust til þess að fara út í eigin rekstur og margir gætu sjálfsagt svipaða sögu sagt," segir Bragi sem leggur á að skátastarfið sé að langmestu leyti unnið í sjálfboðavinnu og þar komi þúsundir karla og kvenna að málum.