Askan frá eldgosinu sést á gervihnattamyndum.

Alþjóðlegri flugumferð yfir íslenska flugstjórnarsvæðinu er nú beint suður fyrir landið, út fyrir áætlaða flugleið, vegna gossins í Eyjafjallajökli. Að sögn Hjördísar Guðmundsdóttur, upplýsingafulltrúa hjá Flugstoðum, eru þetta viðbrögð samkvæmt vinnureglum Flugstoða vegna eldgoss, en þær kveða á um að svæðum sé lokað í 120 sjómílna radíus í kringum eldstöð.

„Þessu svæði er lokað því það er ekki vitað nákvæmlega hvar gosmökkurinn er í loftinu," segir Hjördís. Þetta þýðir að þrír flugvellir, í Keflavík, á Akureyri og í Reykjavík verða lokaðir þar til annað kemur í ljós. „Þetta er allt gert til að tryggja flugöryggi og  í samvinnu við aðrar þjóðir, því þetta getur haft áhrif út fyrir okkar svæði, gosmökkurinn getur borist til Evrópu eða hvert sem veðrið stýrir honum og er ótrúlega fljótur að fara."

Askan frá eldgosinu í Eyjafjallajökli virðist sjást á gervihnattamyndum sem teknar voru í nótt. Á myndinni, sem birtist á vef Eumesat, sést svartur blettur myndast austur af Eyjafjallajökli um klukkan 2 í nótt.

Sex brottfarir voru áætlaðar hjá Icelandair frá landinu á bilinu 07:35 til 8:30 í fyrramálið en samkvæmt upplýsingum Icelandair eru þau ekki á áætlun og er upplýsinga um framhaldið að vænta kl. 09:00 í fyrramálið.