Flugvirkjar við störf. Þorkell Þorkelsson

Fulltrúar Flugvirkjafélag Íslands og Icelandair hafa í dag setið á fundi hjá ríkissáttasemjara, en verkfall flugvirkja hjá Icelandair hefst að óbreyttu á miðnætti. Kristján Kristinsson formaður samninganefndar flugvirkja er þó nokkuð bjartsýnn á að samningar náist í tæka tíð.

„Ef við erum á beinni lokastefnu þarf ekki að vera ýkja langt inn til lendingar. Ég held í vonina og með smá hugarfarsbreytingu hjá öðrum hvorum aðilanum ætti þetta að ganga í gegn. Við erum núna að skoða alla færa möguleika í stöðunni,“ sagði Kristján.

Í fyrstu kröfðust flugvirkjar umtalsverðrar launahækkunar en hafa heldur slegið af þeim að undanförnu. Hafa samningsaðilar álgast hvorn annan að undanförnu og samningaviðræður gærdagsins skiluðu talsverðu. Á fundum í karphúsinu í dag sitja þrír fulltrúa flugvirkja og jafn margir frá SA og Icelandair.

Í fréttatilkynningu frá Icelandair segir að félagið hafi boðið flugvirkjum sömu kauphækkanir og aðrar stéttir félagsins hafa fengið á undanförnum vikum og eru í takti við stöðugleikasáttmálann í samfélaginu. „Samningafundur stendur yfir og það er von Icelandair að samningar náist, ekki komi til verkfalls, og komið verði veg fyrir frekari skaða.

Komi til verkfalls mun allt flug Icelandair stöðvast strax í fyrramálið. Icelandair hvetur farþega og aðstandendur til að fylgjast með fréttum af samningaviðræðum og komu- og brottfarartímum á Keflavíkurflugvelli. “