Konráð Haraldsson á Búðarhóli. Golli

Konráð Haraldsson, 19 ára sonur bændanna á Búðarhóli í Austur-Landeyjum, frétti af gosinu þegar Unnur Brá Konráðsdóttir, þingmaður og föðursystir hans hringdi í hann fyrir miðnætti. Konráð gætti búsins um helgina í fjarveru foreldra sinna en þeir eru ásamt mörgum öðrum bændum á svæðinu í bændaferð á Akureyri. Á Búðarhóli er um 45 mjólkandi kýr og um 30 hross. Einnig hundur sem Konráð tók með sér í bílinn.

Konráð segir að sér hafi ekki brugðið mikið við tíðindin. Hann byrjaði á því að vekja bandarísk hjón með tvö börn sem gistu hjá þeim í bændagistingu. Að sögn Konráðs tóku hjónin tíðindunum með ró. “Þau voru ósköp róleg, ég sýndi þeim á landakorti hvað var að gerast,” sagði hann. “Ég fór svo út í fjós. Kýrnar voru sallarólegar. Þær hljóta nú samt að finna eitthvað á sér, ég kom svo taugaspenntur inn í fjósið.”

Þegar Morgunblaðið ræddi við Konráð á fimmta tímanum í morgun var hann í söluskálanum Björkinni á Hvolsvelli og þar var einnig nokkur hópur bænda sem réði sínum ráðum. Greinilegt var á bændunum að þeir höfðu áhyggjur af búpeningi sínum og hjá lögreglu hefur töluvert verið spurst fyrir um hvort bændur sem þurftu að yfirgefa heimili sín í gær verði ekki örugglega hleypt fram hjá lokunum lögreglu svo þeir komist örugglega til gegninga í morgunsárið. Von er á tilkynningu um hvort bændum verður hleypt fram hjá lokunum innan tíðar, að sögn Kjartans Þorkelssonar, sýslumanns á Hvolsvelli.

Eldgosið hefur færst aukana. Myndin var tekin frá Fljótsdal, innsta bæ í Fljótshlíð. Katrín Möller Eiríksdóttir