Stjórnstöð Almannavarna er í húsi Flugbjörgunar-sveitarinnar á Hellu. Þar stýrir sýslumaðurinn, Kjartan Þorkelsson aðgerðum. Mbl.is/Sigmundur Sigurgeirsson

„Rýmingin gengur mjög vel, þetta hefur allt gengið samkvæmt áætlun,“ segir Kjartan Þorkelsson sýslumaður á Hvolsvelli sem stýrir rýmingu svæðisins.  „Við erum að rýma allt svæðið miðað við áætlun og bíðum eftir að fá nánari upplýsingar um hvar gosið nákvæmlega er og leggjum þá mat á þar hvar hættan verður í framhaldinu  af því.“

Þar til meira er vitað um eðli gossins er miðað við að rýma allt svæðið.  „Við bíðum eftir að heyra frá vísindamönnum sem fljúga þarna yfir og vonandi verður það sem fyrst svo við höfum einhverjar upplýsingar um þetta,“ segir Kjartan. Þeir sem hafa yfirgefið heimili sín eru beðnir um að láta vita af sér og segir Kjartan að unnið sé að því að safna upplýsingum um það. 

„Ég veit ekki betur en að fólk taki þessu með ró. Við náttúrulega æfðum þetta þegar æft var fyrir Kötlugosið 2006 og fórum svo yfir þetta allt á fundum núna í vikunni, við vorum með íbúafundi á mánudag, þriðjudag og miðvikudag bæði í Rangárþingi eystra og Skaftafellssýslunni, þannig að það á að vera nokkuð ljóst hvernig fólk á að haga sér, en við breyttum áætluninni aðeins og rýmum skóga líka. Við bættum því við því það gæti verið einhver hætta á að þetta kæmi niður skógana, þetta er svo austarlega.“

Fjöldahjálparstöð er nú opin í grunnskólanum á Hvolsvelli en þeim sem fara frá Skógum er stefnt á Vík í Mýrdal. „Síðan rýmum við nokkra bæi undir fjöllunum því þetta gæti komið niður á tveimur, þremur stöðum þar. Við rýmum stystu leið út af svæðinu og það er ekki farið yfir ár."  

Rýmingarsvæðið samkvæmt áætlun Almannavarna