Frá gosstöðvunum á Fimmvörðuhálsi mbl.is/Rax

Litlar breytingar hafa orðið á eldgosinu í Eyjafjallajökli í nótt, samkvæmt upplýsingum frá jarðhræringarsviði Veðurstofu Íslands. Gosið hefur verið nokkuð virkt en gosóróinn náði hámarki skömmu eftir miðnætti í nótt. Jókst hann aðeins nú undir morgun en ekkert að ráði, samkvæmt upplýsingum frá Veðurstofu Íslands.

Ekkert virðist benda til þess að það sé að það sé að opnast nýjar sprungur undir jöklinum sjálfum en nú gýs á Fimmvörðuhálsi. Samkvæmt upplýsingum frá lögreglunni á Hvolsvelli virtist vera talsverð virkni í gosinu í nótt en lögreglan fylgist náið með stöðu máli í Rangárvallasýslu. 

Vegurinn enn lokaður inn í Þórsmörk

Líkt og fram kom í gær hafa helstu þjóðvegir um Rangárþing verið opnaðir á ný og var að sögn lögreglu talsverð umferð snemma í nótt, bæði fólk að fara af svæðinu og fólk að skoða gosið. Öll umferð er hins vegar bönnuð í Þórsmörk og að sjálfsögðu upp á Fimmvörðuháls.

Jarðskjálftar hafa verið litlir og grunnir í nótt, flestir á um 5 km dýpi. 

Fjöldahjálparstöðvum Rauða krossins á Hvolsvelli, Hellu og í Vík í Mýrdal var lokað í gær en opið var í Drangshlíð undir Eyjafjöllum, að sögn lögreglu í morgun.

Fundur hjá Almannavörnum klukkan 9

Fundur hefur verið boðaður hjá Almannavörnum klukkan 9 en í gær var lagt til að sumarhúsaeigendur á hættusvæðinu dveldu ekki í húsum sínum í nótt. Drangshlíðardalur er rýmdur. Austur Eyjafjöll ofan vegar, Núpakot, Þorvaldseyri, Seljavellir og Lambafell, Austur Eyjafjöll neðan við veg, Önundarhorn, Berjanes, Stóra Borg, Eyvindarhólar og Hrútafell. Rýmingar í Fljótshlíð, Rauðuskriður og Fljótsdalur. Rýmingar í Austur Landeyjum, Brú, Leifsstaðir.

Yfirdýralæknir og Matvælastofnun mælast til þess við bændur að þeir fylgist vel með öskufalli vegna hættu sem búfénaði getur stafað af mengun sem því fylgir. Þá óskar Veðurstofan sérstaklega eftir að upplýsingum um öskufall verði komið til stofnunarinnar.