Þingfesting í nauðgunarmáli
Maðurinn kom sér í samband við stúlkurnar á samskiptavefnum Facebook. Árni Sæberg
Mál á hendur karlmanni sem nálgaðist ungar stúlkur í gegnum samskiptavefinn Facebook og beitti þær kynferðislegu ofbeldi verður þingfest í dag. Maðurinn er ákærður fyrir tvö kynferðisbrot en hugsanlegt er að gefin verði út framhaldsákæra vegna tveggja brota til viðbótar.
Réttarhaldið fer fram fyrir luktum dyrum og ákæran fæst ekki afhend. Samkvæmt heimildum mbl.is er annars vega ákært fyrir nauðgun og frelsissviptingu en í því tilviki var um að ræða sextán ára stúlku. Hins vegar er ákært fyrir nauðgun og kynferðisbrot gegn barni yngra en fimmtán ára.
Maðurinn hefur sætt gæsluvarðhaldi frá síðasta ári. Hæstiréttur hefur ætíð staðfest gæsluvarðhaldsúrskurði Héraðsdóms Reykjavíkur og má í þeim lesa „sláandi lýsingar“ svo notuð séu orð úr úrskurðinum. Án þess að farið sé djúpt ofan í þær lýsingar kemur fram að maðurinn sló aðra stúlkuna í andlitið þar sem hún stundi ekki nógu hátt.
Einnig ákært fyrir mjög gróft barnaklám
Auk ákærunnar sem þingfest verður eftir hádegið á ríkissaksóknari eftir að taka afstöðu til mála tveggja annarra stúlkna, sem grunur leikur á maðurinn hafi brotið gegn. Verði ákæra gefin út er líklegt að ákært verði fyrir nauðgun og kynferðisbrot gegn börnum.
Við rannsókn á tölvubúnaði mannsins fannst myndefni sem talið er benda til afbrigðilegra kynhvata ákærða og augljóst þyki að hann hafi ekki taumhald á þeim. Að mati rannsakenda er talið fíkniefnaneysla mannsins hafi þar einhver áhrif. Einnig er ákært vegna þessa efnis, en á meðal þess eru hreyfimyndir sem hafi að geyma barnaklám þar sem sjá megi stúlkubörn beitt grófu kynferðisofbeldi, svokölluðu BDSM.
Að endingu er maðurinn ákærður fyrir innbrot, þjófnaðarbrot, gripdeildir, umferðarlagabrot og fíkniefnabrot. Ljóst þykir að maðurinn hafi framfleytt sér með afbrotum.
Allt að sextán ára fangelsi
Brot mannsins eru litin afar alvarlegum augum, enda hafi hann yfirburði í aldri og þroska fram yfir stúlkurnar. Þá sé það talið endurspegla aukinn ásetning mannsins að hann láti ekki segjast og hafi ekki liðið nema vika frá því að hann var yfirheyrður vegna meints kynferðisbrots gegn ungri stúlku og þar til hann hafði sett sig í samband við þá næstu.
Verði hann sakfelldur varða brot hans allt að sextán ára fangelsisrefsingu.
