Amnesty vill láta stöðva framsal til Grikklands
Ragna Árnadóttir hefur fengið sent bréf frá Amnesty þar sem þess er krafist að Ísland stöðvi nú þegar allan flutning hælisleitenda til Grikklands.
Stöðva þarf nú þegar framsal hælisleitenda til Grikklands frá ríkjum sem eiga aðild að Dyflinnar-reglugerðinni. Þetta kemur fram í nýrri skýrslu Amnesty International sem nefnist Dyflinnar gildran.
Íslandsdeild Amnesty International hefur sent dómsmála- og mannréttindaráðherra, Rögnu Árnadóttur, eintak af skýrslunni ásamt bréfi þar sem fram kemur krafa um að Ísland stöðvi nú þegar allan flutning hælisleitenda til Grikklands.
Eiga á hættu nauðungarflutninga
Í skýrslunni kemur fram að einstaklingar sem sendir eru til Grikklands á grundvelli Dyflinnar-reglugerðarinnar eiga á hættu að verða fyrir margvíslegum mannréttindabrotum, þar með talið að vera fluttir nauðugir til staða þar sem þeir eiga á hættu ofsóknir.
Í skýrslunni er að finna ítarlega úttekt á áhrifum Dyflinnar-reglugerðarinnar á réttindi hælisleitenda og nákvæma skoðun á aðstæðum þeirra í Grikklandi.
Dregið er fram hvernig grísk yfirvöld hafa brugðist að veita hælisleitendum sanngjarna málsmeðferð. Þeir hafa ekki fullnægjandi aðgang að lögfræðiráðgjöf, túlkaþjónustu og nauðsynlegum upplýsingum. Dæmi eru um að hælisleitendum hafi verið vísað nauðugum til Tyrklands, samkvæmt tilkynningu frá Amnesty International.
Skýrsla Amnesty International sýnir fram á að forsenda Dyflinnar-reglugerðarinnar, að öll ríki sem eiga aðild að reglugerðinni veiti flóttamönnum samsvarandi vernd, stenst ekki. Hælisleitendur sem koma fyrst til Grikklands standa oftar en ekki frammi fyrir brotum á mannréttindum og ógn um öryggi sitt.
SÞ hvetja aðildarríki Dyflinar-reglugerðarinnar að senda ekki hælisleitendur til Grikklands
„Frá því í apríl 2008, hefur Flóttamannastofnun Sameinuðu þjóðanna hvatt aðildarríki Dyflinnar-reglugerðarinnar til að senda ekki hælisleitendur aftur til Grikklands. Þessi krafa Flóttamanna-stofnunarinnar var gerð vegna alvarlegra bresta í meðferð hælismála í Grikklandi, auk þess sem móttaka og aðstæður hælisleitenda í landinu eru óásættanlegar. Rannsókn Amnesty International sýnir að ástandið hefur versnað enn frekar, einkum eftir gildistöku laga í júlí 2009 þar sem áfrýjunarréttur hælisleitenda er skertur.
Það er ljóst að hælisleitendur í Grikklandi njóta ekki nauðsynlegrar verndar og réttindi þeirra eru ekki virt að fullu. Þrátt fyrir þetta halda ríki, sem eiga aðild að Dyflinnar-reglugerðinni, áfram að senda fólk til baka til Grikklands. Þau lönd sem endursenda hælisleitendur þangað verða að horfast í augu við þá staðreynd að hælisleitendur þar njóta ekki þeirrar verndar sem alþjóðalög kveða á um. Amnesty International leggur til að öll aðildarríki Dyflinnar-reglugerðarinnar stöðvi nú þegar allan flutning hælisleitenda til Grikklands," segir í tilkynningu.
