Forsvarsmenn netsíðunnar Wikileaks, sem sérhæfir sig í að birta leyniskjöl á netinu, segjast hafa sætt eftirliti bandarískra leyniþjónustustofnana. Segir Julian Assange, ritstjóri síðunnar, í Twitterfærslum að tveir starfsmenn bandaríska utanríkisráðuneytisins hafi nýlega fylgt honum eftir til Íslands. 

Þá segir hann einnig að starfsmaður Wikileaks hafi verið hafður í haldi í 22 stundir og að stjórnvöld hafi lagt hald á tölvur á vegum vefsíðunnar. 

„WikiLeaks er nú undir stöðugu eftirliti bandarískra og íslenskra stjórnvalda. Eftirför/ljósmyndun/kvikmyndataka/handtaka," skrifar Assange á Twitter. „Komi eitthvað fyrir okkur vitið þið ástæðuna: það er 5. apríl myndin. Og þið vitið hverjir bera ábyrgðina," skrifaði hann. 

Fram kemur á breska vefnum V3, að Wikileaks hafi boðað til fundar 5. apríl í  National Press Club í Washington þar sem sýna á myndir af sprengjuárás í Afganistan 7. maí á síðasta ári þar sem 97 óbreyttir borgarar létu lífið. 

Wikileaks birti í síðustu viku á vef sínum bandaríska leyniskýrslu þar sem vefsíðan er skilgreind sem hugsanleg ógn við Bandaríkjaher.

Frétt V3