Þórður S. Gunnarsson og Sigurður Tómas Magnússon

Sigurður Tómas Magnússon lögfræðingur hefur tekið við stöðu atvinnulífsprófessors við lagadeild Háskólans í Reykjavík. Hann er fyrstur til að gegna þeirri stöðu við HR.

Samkvæmt reglugerð skólans geta þeir einir orðið atvinnulífsprófessorar sem verið hafa leiðandi í atvinnulífinu á sínu sérsviði, eru þekktir af verkum sínum og viðurkenndir sem áhrifavaldar á vinnubrögð í faginu.
 
Atvinnulífsprófessor skal einnig hafa sýnt fram á ótvíræða hæfni til kennslu og miðlunar á háskólastigi, að því er segir í tilkynningu frá HR.
 
Þórður S. Gunnarsson, forseti lagadeildar HR, segir í tilkynningu til starfsmanna HR í dag að Sigurður Tómas sé vel að þessari virðingu kominn. „Ég vil nota tækifærið og færa Sigurði innilegar þakkir fyrir margháttað og veigamikið framlag hans til lagadeildar HR á liðnum árum í þeirri von að við njótum starfskrafta hans á vettvangi Háskólans í Reykjavík um langa framtíð.“
 
Sigurður Tómas hefur kennt við lagadeild HR frá árinu 2003, fyrst sem stundakennari en síðan eða frá 2004 sem fastráðinn sérfræðingur og aðalkennari í réttarfari.
 
Sigurður Tómas hefur  samhliða kennslu og rannsóknum við lagadeild HR verið  lögfræðilegur ráðgjafi sérstaks saksóknara vegna bankahrunsins frá 2009.
 
Matsnefnd til að meta hæfi Sigurður Tómasar til að gegna umræddri stöðu var skipuð þeim Guðrúnu Erlendsdóttur, fyrrverandi hæstaréttardómara en hún var jafnframt formaður nefndarinnar, dr. juris Guðmundi Sigurðssyni, prófessor við lagadeild HR, og Ragnari Aðalsteinssyni hæstaréttarlögmanni.