Hægt er að sækja GPS feril hjá Slysavarnafélaginu Landsbjörg sem sýnir leiðina að gosstöðvunum. Jónas Erlendsson

Slysavarnafélagið Landsbjörg (SL) varar við því að ferðir á jöklum eru alltaf varasamar. Til að auka öryggi er gott að aka eftir leiðum sem eknar hafa verið nýverið og við svipaðar aðstæður. Hægt er að nálgast GPS ferla fyrir leiðir að gosstöðvunum á heimasíðu félagsins.

Á heimasíðu Slysavarnafélagsins Landsbjargar er hægt að nálgast leið yfir jökulinn að gosstöðvunum sem Ríkarður Sigmundsson hjá Garmin búðinni hefur útvegað. Leiðin, sem er bæði fyrir jeppa- og sleðafólk hefst á hefðbundnu jeppaleiðinni um Mýrdalsjökul  og endar rétt þegar komið er niður á Fimmvörðuháls. Þaðan eru aðeins 2 km að hrauninu.

Rétt er að árétta að í upphafi leiðarinnar að fara ekki upp að ferðaþjónustunni Arcanum heldur að leggja neðar og hafa bíla og kerrur sem skilja á eftir vel fyrir utan við veginn. 
 
Slysavarnafélagið Landsbjörg minnir á að það getur verið varasamt að fara alveg að gosstöðvunum vegna hættu á sprengingum sem kasta gosefni fleiri tugi metra og geta hæglega lent á þeim sem nærri eru.
 
MIKILVÆGT!

Leiðir sem ferðamenn hafa ekki ekið sjálfir skal alltaf taka með varúð og aka aðeins í góðu skyggni. Notkun leiðarinnar er ferðafólki frjáls en á þeirra eigin ábyrgð. Mikilvægt er að GPS tæki séu rétt stilt og þekking sé til staðar á notkun þeirra.