Störf rafiðnaðarmanna eru fjölbreytt er mikið hefur þó fækkað í þeirra röðum. mbl.is/Kristinn

Rafiðnaðarmönnum hér á landi hefur fækkað um liðlega þúsund frá efnahagshruninu haustið 2008 auk þess sem rúmlega 200 úr þeirra röðum eru skráðir atvinnulausir. Þetta kemur fram í grein á vefsetri Rafiðnaðarsambands Íslands.

Rækkun starfa í rafiðnaðargeiranum kemur ekki fram í atvinnuleysistölum segir í pistlinum. Þar er bent á að félagsmenn Rafiðnaðarsambandsins hafi verið liðlega 6.000 á árinu 2008. Það hve margir hafi horfið úr greininni síðan þá sé stærsti þáttur í því hvers vegna hlutfall atvinnuleysis í rafiðnaðargeiranum sé töluvert lægra en landsmeðaltal og það sem gerist í öðrum iðngreinum, eða á bilinu tvö til fjögur prósent á meðan meðaltalið á landsvísu sé frá um 7 til 11%.

Frá haustinu 2008 hafa um það bil 400 rafiðnaðarmenn farið til náms. Þegar spennan var hvað mest á byggingarmarkaði 2005 til 2008 fóru allmargir úr verknámskólunum út á vinnumarkað, enda stóðu mörgum til boða góð störf, mikil vinna og góð laun. Þessir einstaklingar fóru aftur til náms þegar harðnaði á dalnum og aðrir í framhaldsnám. „Stór hluti þessara nema lýkur námi á þessu ári og kemur þá tilbaka, utan þeirra sem fara beint í framhaldsnám,“ segir í pistlum þar sem vakin er athygli á því að tæplega 300 erlendir rafiðnaðarmenn hafi farið af vinnumarkaði frá Hruni, auk þess hafa um 100 íslenskir rafiðnaðarmenn farið erlendis.