„Ef fylgt væri öflugri atvinnustefnu gæti kreppunni lokið á þessu ári,“ segir á vef SA. mbl.is/Heiddi

Samtök atvinnulífsins segja það óviðunandi að yfir 15.000 Íslendingar séu nú án atvinnu og um 1.500 til viðbótar á atvinnuleysisskrá að hluta. SA benda á að stór hópur fólks hafi jafnframt orðið að minnka við sig vinnu og horfast í augu við lægri tekjur. 

„Samtök atvinnulífsins telja þetta óviðunandi og vilja bregðast við, rjúfa kyrrstöðuna sem ríkir í efnahags- og atvinnulífi þjóðarinnar og hefja uppbyggingu af krafti. Ef fylgt væri öflugri atvinnustefnu gæti kreppunni lokið á þessu ári,“ segir á vef SA.

Fram kemur að Samtök atvinnulífsins hafi með þetta að leiðarljósi sett fram aðgerðaáætlun undir yfirskriftinni Atvinna fyrir alla en hún miði að því að stuðla að sköpun nýrra starfa og byggja upp atvinnulífið á þessu ári og í næstu framtíð. Megin markmiðið sé að útrýma atvinnuleysi og tryggja að ný störf verði til fyrir þá sem koma út á vinnumarkaðinn á næstu árum. 

„Samtök atvinnulífsins líta svo á að SA hafi í raun verið vísað frá stöðugleikasáttmálanum sem gerður var á síðasta ári með aðild alls vinnumarkaðarins og ríkisstjórnarinnar.  Markmið sáttmálans var að stuðla að samstilltu og öflugu átaki í atvinnumálum sem því miður hefur ekki gengið eftir. Ráðherrar ríkisstjórnarinnar hafa talið sig óbundna af þeim samningum sem oddvitar ríkisstjórnarinnar undirrituðu og  því brast traust milli SA og ríkisstjórnarinnar.

 Viðbrögð SA þurfa ekki að koma stjórnvöldum á óvart en Samtök atvinnulífsins hafa allt frá því í október 2009 lýst yfir miklum áhyggjum við ríkisstjórnina vegna framgangs stöðugleikasáttmálans. Upplausn hans er mjög óæskileg vegna mikilvægis þess að samstaða ríki með stjórnvöldum og aðilum vinnumarkaðarins á þessum erfiðu tímum,“ segir á vef SA