Sauðárkrókur. www.mats.is

Tillaga framsóknarmanna, sem eru í meirihluta í sveitarstjórn Skagafjarðar ásamt Samfylkingu, um að taka ákvörðun um að hefja framkvæmdir við byggingu Árskóla féll á jöfnu í kvöld. Meirihlutinn er þó ekki sprunginn í sveitarstjórninni, að sögn Gunnars Braga Sveinssonar oddvita framsóknarmanna.

Fjórir fulltrúar Framsóknar studdu tillöguna um ákvörðun um að hefja framkvæmdir, fulltrúi Samfylkingar sat hjá en fulltrúar Sjálfstæðisflokks og VG voru á móti. 

Gréta Sjöfn Guðmundsdóttir, fulltrúi Samfylkingar og forseti sveitarstjórnar, bar fram breytingartillögu við tillögu framsóknarmanna sem var felld með fjórum atkvæðum. Fulltrúar Framsóknarflokks sátu hjá við þá atkvæðagreiðslu. 

„Það eru gríðarleg vonbrigði fyrir okkur að ekki hafi náðst að klára að koma málinu áfram,“ sagði Gunnar Bragi Sveinsson, oddviti framsóknarmanna og varaforseti sveitarstjórnar. „Við höfum unnið að þessu lengi og þetta er í samstarfssáttmála flokkanna í meirihlutanum.“

Kaupfélag Skagfirðinga hafði boðist til að fjármagna framkvæmdirnar til að byrja með svo verkið gæti hafist en síðan ætlaði sveitarfélagið að útvega aðra fjármögnun.  Áætlaður kostnaður við skólann er 1,4 milljarðar króna.

Gunnar Bragi gerir ráð fyrir því að meirihlutinn fari yfir þetta mál eftir páskana. 

Fréttavefurinn Feykir greindi frá því í morgun að Gréta Sjöfn Guðmundsdóttir segi í grein í Feyki að „það að fara af stað með verkið án þess að unnin sé vönduð áætlanagerð þar sem fram komi hvaða áhrif byggingin hafi á rekstur og þjónustu um ókomin ár sé fullkomlega óábyrgt.“

Fyrirsögn fréttar Feykis var „Meirihluti á endastöð?“ Hún gaf til kynna að málið kynni að reynast sveitarstjórnarmeirihlutanum skeinuhætt.