Styrkirnir eru veittir á grundvelli samnings þriggja ráðuneyta og Sambands íslenskra sveitarfélaga. Guðmundur Rúnar Guðmundsson

Úthlutað verður styrkjum upp á samtals 80 milljónir til verkefna sem ætlað er að efla þjónustu í heimabyggð við langveik börn og börn með athyglisbrest og ofvirkni. Verkefnin eru um allt land, samkvæmt frétt félagsmálaráðuneytisins.

Alls bárust 80 umsóknir frá 30 sveitarfélögum, samtökum sveitarfélaga og skólaskrifstofum. Umsóknirnar hljóðuðu samtals upp á rúmlega 287 milljónir króna.

„Að mati verkefnisstjórnar bera umsóknirnar þess glöggt vitni að víða sé unnið að þróun margvíslegrar þjónustu við þá hópa barna sem hér um ræðir. Við mat á umsóknum lagði verkefnisstjórnin áherslu á að úthlutun nýtist börnum og fjölskyldum þeirra sem best og að jafnframt sé stuðlað að samvinnu þeirra aðila sem að málaflokknum koma.

Mikill meiri hluti umsókna var til verkefna sem varða þjónustu við börn með ofvirkni og athyglisbrest en umsóknir um verkefni sem mæta þörfum langveikra barna voru tiltölulega fáar. Öll verkefni sem tengjast langveikum börnum hljóta styrk. Verkefni vegna barna með ofvirkni og athyglisbrest fá hins vegar ekki öll úthlutun og yfirleitt aðeins hluta af þeirri fjáhæð sem sótt var um,“ segir í frétt félagsmálaráðuneytisins.