Ögmundur Jónasson, Guðfríður Lilja, Haraldur Áss sonur hennar, og Sigríður Heiðberg undirbúa ,,kattasmölunina" sem fór víst aldrei fram. Árni Sæberg

„Fólk hafði gaman af þessu," sagði Sigríður Heiðberg, formaður Kattavinafélagsins, um baksíðufrétt Morgunblaðsins í dag um keppnina í kattasmöluninni sem kynnt var til sögunnar. Hún segir fjölmarga hafa hringt í Kattholt í morgun til að kanna hvort þetta væri ekki örugglega gabbfrétt. „Ég harðneitaði því að sjálfsögðu.“

Ögmundur Jónasson og Guðfríður Lilja Grétarsdóttir, þingmenn VG, brugðu á leik ásamt Sigríði við undirbúning fyrir kattasmölunina, en fræg eru orðin þau ummæli Jóhönnu Sigurðardóttur forsætisráðherra að það að smala saman meirihluta á Alþingi væri eins og að smala köttum. Vildu Ögmundur og Guðfríður Lilja sýna fram á að þetta væri vel hægt, með því að fara vel að köttunum! Hyggajst þingmenn VG a.m.k. safna liði og gerast félagar í Kattavinafélaginu. Er þingmönnunum og Sigríði þökkuð aðstoðin við „fréttina“.

Önnur einkennileg frétt var í Morgunblaðinu og á mbl.is í dag, um myndlistargjörning nemenda í Listaháskólanum. Nakin kona í búri og á hlaupahjóli að auki, með jakkafataklædda menn á hælunum, var hreinn hugarburður blaðamanna í tilefni dagsins. Reyna eflaust margir að opna myndskeið sem á að vera tengt við fréttina.

Ennfremur var það aprílgabb hjá Heimdellingum með ókeypis ljósakortin en einhver forvitin og sólþyrst ungmenni munu hafa gripið í tómt í Valhöll í dag.

Hrægammurinn Gordon Brown

Fleiri fjölmiðlar hafa brugðið á leik í dag. Svo tekin séu nokkur dæmi af handahófi þá var RÚV með frétt í hádeginu af hrægammi sem fundist hefði í borginni og verið vistaður í Fjölskyldu- og húsdýragarðinum. Óskaði fréttastofan eftir nafni á fuglinn og ekki stóð á ábendingunum. Vildu margir hlustendur nefna hrægamminn eftir útrásarvíkingunum en einnig komu nöfn eins og Gosi, Ási og Gordon Brown.

Á Stöð 2 í kvöld var „frétt“ þess efnis að aukin virkni væri komin í goshverinn við Perluna í Öskjuhlíð, sem rekja mætti til eldgossins á Fimmvörðuhálsi. Talað var við Harald Sigurðsson eldfjallafræðing sem útlistaði þessi tengsl, en þess skal getið að um manngerðan hver er að ræða sem er ekki í nokkrum tengslum við jarðskorpuna undir niðri.

Fréttablaðið var með frétt í dag um ókeypis flug fyrirtækisins ECA yfir gosstöðvarnar á Fimmvörðuhálsi í Herkúles-herflugvélum, í þeim tilgangi að bæta ímynd fyrirtækisins sem hyggst vera með starfsemi á Keflavíkurflugvelli.

Margir munu hafa hlaupið 1. apríl vegna fréttar Víkurfrétta um víðtæka páskaeggjaleit á Suðurnesjum, í tilefni 30 ára afmælis blaðsins. Vefurinn feykir.is sagði frá því í morgun að Keflvíkingar hefðu gefið oddaleikinn gegn Tindastóli í úrslitakeppni úrvalsdeildar karla í körfuknattleik, vegna innbyrðis deilna í stjórn körfuknattleiksdeildar Keflvíkinga. Leikurinn fór nú fram engu að síður í Keflavík í kvöld og Tindastóll tapaði.

Að endingu fyrir áhugasama um kattasmölun þá getur hér að líta myndband af kattahirðum í Bandaríkjunum.