Verið er að flytja flakið suður til Reykjavíkur til frekari rannsóknar. mbl.is/Guðmundur Karl

Búið er að koma flakinu af flugvélinni sem brotlenti við Flúðir í dag á vörubíl sem mun flytja það suður til Reykjavíkur, til frekari rannsóknar hjá Rannsóknarnefnd flugslysa. Er þetta fyrsta flugslysið hér á landi í ár en flugóhapp varð á Fimmvörðuhálsi í síðustu viku án þess að slys urðu á fólki.

Bragi Baldursson, starfsmaður Rannsóknarnefndar flugslysa, sagði í samtali við mbl.is í kvöld að flugvélin væri mjög mikið skemmd og gott ef ekki ónýt. Hún er af gerðinni Cessna, framleidd árið 1968, fjögurra sæta einhreyfilsvél. Fjórir voru um borð og þar af slösuðust þrír alvarlega og fluttir með þyrlu Landhelgisgæslunnar til Reykjavíkur. Þeir eru til rannsóknar á Landspítalanum í Fossvogi og liggja nú á gjörgæsludeild.

Um tildrög slyssins vildi Bragi lítið segja á þessari stundu, það væri ásamt öðru tengdu atvikinu til rannsóknar. Sjónarvottar lýsa því þannig að vélinni hafi verið flogið mjög lágt yfir sumarhúsabyggð og rekið annan vænginn niður í jörðina. Bragi segir það ekki liggja fyrir í hvaða flughæð vélin var komin í, en hún var að koma frá Reykjavík og á leið að gosstöðvunum á Fimmvörðuhálsi með viðkomu á Flúðum.