Björgunarsveitarmenn standa nú vaktina á Morinsheiði til þess að hindra að almenningur fari sér að voða með því að fara of nálægt gosstöðvarnar. Þetta segir Svanur Sævar Lárusson, formaður Flugbjörgunarsveitarinnar á Hellu. Tekur hann fram að fólk geti engu að síður komist nógu nálægt til þess að njóta gossins, en bannað verður að fara upp á Hraunkambana þar sem þeir séu einfaldlega of hættulegir við núverandi aðstæður.

Spurður hvort von sé á mörgum ferðalöngum í dag segir Svanur erfitt að spá fyrir um það þar sem ekki sé ósennilegt að margir hafi frestað ferð sinni austur þegar svæðið var lokað í kjölfar þess að ný sprunga opnaðist skyndilega á Fimmvörðuhálsinum. Alls eru á sjötta tug björgunarsveitarmanna að störfum í dag, þar af um fjórir á Morinsheiði.

Að sögn Svans er mjög kalt á Fimmvörðuhálsi sem stendur og norðan næðingur og því mikilvægt að þeir sem hyggjast leið sína á hálsinn séu vel útbúnir í marglaga flíkum, með húfu og vettlinga.