Frá rokkhátíðinni í gær. mbl.is/Ernir

Rokkhátíð alþýðunnar, Aldrei fór ég suður hófst á Ísafirði klukkan 18 í gær í skemmu verktakafyrirtækisins KNH. Mikill fjöldi fólks safnaðist saman á hátíðinni í gærkvöldi en hún heldur áfram í dag og í kvöld.

Á meðal þeirra tónlistarmanna sem tróðu upp í gær má nefna sjálfan Mugison, einn stofnanda hátíðarinnar sem nú er haldin í sjöunda sinn. Mugison fékk afar hlýjar móttökur eins og jafnan á hátíðinni og myndaðist frábær stemning þegar hann flutti tónlist sína. 

Samgöngur gengu vel bæði á miðvikudag og fimmtudag en þá ferðast fjöldi fólks vestur af höfuðborgarsvæðinu. Samgöngur fóru aðeins úr skorðum í gær vegna mikillar snjókomu og fór síðari vél Flugfélagsins ekki í loftið. Um borð í henni áttu að vera hljómsveitirnar Hjálmar og Ingó og veðurguðirnir. Meðlimir þessara hljómsveita fóru þess í stað keyrandi og voru komnir upp á svið á Ísafirði í gærkvöldi. Ólöf Arnalds lék einnig í gær sem og hljómsveitin Bloodgroup við góðar undirtektir auk fleiri hljómsveita.

Forskot var tekið á sæluna á fimmtudagskvöldið en þá léku Morðingjarnir og Reykjavík! á skemmtistaðnum Krúsinni á Ísafirði.  Þá skemmtu einnig uppistandararnir í Mið-Íslandi.

Í dag og í kvöld eiga margir þekktir tónlistarmenn eftir að troða upp. Má þar nefna Hjaltalín, Dikta, Lay Low auk þess sem ísfirska grugghljómsveitin Urmull snýr aftur eftir um 15 ára hlé. 

Mugison tróð upp í gær ásamt sveit sinni. mbl.is/hag