Rammvilltir á Fimmvörðuhálsi
Maður á göngu á Fimmvörðuhálsi um helgina. mbl.is/RAX
Björgunarsveitir leituðu í nótt tveggja gönguhópa á Fimmvörðuhálsi. Þrír rammvilltir göngumenn fundust skammt frá Baldvinsskála en sex manna hópur skilaði sér af sjálfsdáðum niður í Skóga.
Þrír ungir en illa búnir menn óskuðu aðstoðar þar sem þeir voru komnir út úr slóð og voru villtir á leið frá eldstöðinni. Samkvæmt upplýsingum lögreglu töldu mennirnir sig vera á Fimmvörðuhálsi en vissu ekkert hvar.
Björgunarsveitarmenn fundu þá upp úr klukkan hálf fimm í morgun í nágrenni Baldvinsskála.
Í nótt var tilkynnt um sex manna hóp gönguhóp sem talinn var hafa villst. Fólkið hafði samband við aðstandendur en ekki lögreglu sem ekki tókst að ná sambandi við það. Fólkið komst sjálft til byggða.
Fjöldi fólks var að fylgjast með gosinu, af Fimmvörðuhálsi og frá útsýnisstöðum í byggð. Þannig var gríðarlegur fjöldi í Fljótshlíðinni.
Fleiri atvik komu upp hjá lögreglunni sem enn er verið að kanna. Meðal annars hafa bílar verið yfirgefnir uppi á jökli.
Kraftur var í gosinu seint í gærkvöldi og norðurljós dönsuðu á himni.
Ekki er vitað til þess að slys eða óhöpp hafi orðið hjá göngufólki, eins og í fyrrinótt þegar kalla þurfti út björgunarþyrlu nokkrum sinnum.
Björgunarsveitarmenn og lögregla eru á vakt á nokkrum stöðum í Goðalandi, á Fimmvörðuhálsi og við Skóga og Sólheima. Nú er fátt fólk við gosstöðvarnar. Að sögn björgunarsveitarmanna sem fóru um Mýrdalsjökul nú í morgun er færi þar fyrir bíla á 38 tommu dekkjum en ekki fyrir bíla á minni dekkjum.
Nokkrar breytingar urðu við gosstöðvarnar í gær og í fyrrinótt. Hraunið hefur breitt úr sér á stærra svæði, þar sem útsýnissvæðin eru, og hefur það brætt mikið af snjó og ís. Vatnið hefur runnið til norðausturs og skorið sprungu í ísinn á rúmlega 600 metra kafla.
Almannavarnadeild ríkislögreglustjóra segir, að þessi sprunga sé hættuleg allri umferð á svæðinu og þeir sem fara þarna um eru hvattir til að sýna aðgát og leita til lögreglu eða björgunarsveita á staðnum ef það vantar frekari upplýsingar.
Þá hefur hraun einnig farið að renna frá nýju sprungunni til vesturs í Hvannárgil og stendur gufustrókur uppúr því.
