Tveir vélsleðamenn óku fram af snjóhengju við Drangajökul í nótt. Annar slasaðist nokkuð í andliti og á hendi. Þeir voru fluttir á heilsugæslustöðina á Hólmavík til aðhlynningar og skoðunar.
Mennirnir voru á heimleið úr vélsleðaferð rétt fyrir klukkan eitt í nótt. Skyggni var lélegt. Samkvæmt upplýsingum lögreglu sáu þeir ekki snjóhengjuna fyrr en of seint og lentu fram af henni.
Sleðarnir eru illa farnir.
Félagar í Björgunarsveitinni Dagrenningu á Hólmavík fóru til aðstoðar. Þeir komu með mennina á heilsugæslustöðina snemma í morgun.