Það er ekki bara á Íslandi sem menn skjóta ísbirni. Skinn af moskuxum, selum og hvítabjarndýrum prýða útveggi húsa um allan bæ þar sem þau hanga til þerris. Ljósmynd Arnar Valgeirsson

Tveir íslenskir skákmenn, þeir Sverrir Unnarsson og Arnar Valgeirsson, eru nú staddir í Ittoqqortoormiit á Grænlandi á vegum taflfélagsins Hróksins þar sem þeir stóðu fyrir skákkennslu og mótum yfir páskana.

„Okkur er alls staðar tekið vel og þegar við erum á ferðinni koma alltaf nokkrir krakkar til að spyrjast fyrir um hvenær verði teflt næst. Þegar við mætum í skólann er komin biðröð fyrir utan. Allir vilja vera fyrstir inn til að hefja baráttuna á reitunum 64,“ segir Sverrir á bloggsíðu sem haldið er úti um ferðina.

Þannig mættu hátt í 50 manns einn daginn þrátt fyrir að veðrið hafi verið með versta móti, en hitastigið hefur farið niður í 27 gráður undir frostmarki á næturnar að sögn Arnars.

Ittoqqortoormiit við Scoresbysund er einn afskekktasti bær Grænlands. Bærinn liggur á 70. gráðu norðlægrar breiddar og aðeins er hægt að nálgast næsta flugvöll í nokkra mánuði á ári með þyrlu. Börnin í bænum fara því ekki langt yfir páskana enda eru yfir 800 kílómetrar þaðan yfir til næsta bæjar sem er Kulusuk. Taka þau því leiðangursmönnum fagnandi og segist Arnar hafa það fyrir satt að heimsóknir skákfólksins frá Íslandi sé hápunktur vetrarins hjá krökkunum í bænum.

Sjá nánar um Grænlandsferð skákmeistaranna í Morgunblaðinu í dag.

Grænlensk börn eru áhugasöm um skák. Ljósmynd Arnar Valgeirsson