Svæðið þar sem leitað var að fólkinu. www.mats.is

Maðurinn sem fannst um kl. 21.30 við Bláfjallakvísl var látinn þegar að honum var komið. Hann fannst í um 4-5 km fjarlægð suður af bíl sínum, sem fannst síðdegis í Hvanngili við Stórusúlur. Maðurinn var fæddur árið 1955.

Um 280 björgunarsveitamenn úr 28 sveitum tóku þátt í leitinni í kvöld.
Leitarsvæðið afmarkaðist af Mýrdalsjökli, Markarfljóti og Mælifellssandi og voru leitarskilyrði ágæt fyrir vélsleða og skíðamenn þar sem snjór var yfir öllu. Meðan á leitinni stóð gekk á með kröppum éljum en á milli var bjart og leitaraðstæður þokkalegar, að sögn Slysavarnafélagsins Landsbjargar.

Fóru að gosstöðvunum á Páskadag

Karlmaðurinn fór ásamt tveimur konum að gosstöðvunum á Páskadag. Talið er að á heimleið hafi þau villst af leið. Snemma aðfaranótt mánudags hafði maðurinn samband við lögregluna á Hvolsvelli. Hann var ásamt konunum um borð í jeppling og að því hann taldi kominn á aurana innan við Tröllagjá, sem er innan við Gilsá og á leiðinni að Einhyrningi.

Þá gerðu lögregla og björgunarsveitir fimm tíma árangurslausa leit á svæðinu. Ökumaðurinn var þó í næstum stöðugu símasambandi við lögreglu. Um klukkan 6.30 í gærmorgun hringdi ökumaðurinn svo í lögregluna og afþakkaði aðstoð. Hann kvaðst þá búinn að losa bíl sinn og vera kominn á slóða.

Þegar ættingjar fólksins fóru að grennslast fyrir um það um klukkan tvö síðastliðna nótt hófst leit að nýju. Þyrla Landhelgisgæslunnar var notuð til leitar úr lofti og björgunarsveitir á bílum og snjósleðum leituðu á jörðu niðri.

Um miðjan dag fannst kona á gangi við Emstruleið, ofan við Einhyrning. Konan sem fædd er árið 1977 var köld og hrakin en annars við góða heilsu. Hún var færð um borð í þyrlu Gæslunnar og flogið með hana til Reykjavíkur. Síðdegis fannst svo bíll fólksins bensínlaus og mannlaus í Hvanngili við Stórusúlur. Þar skammt frá fannst einnig hin konan látin. Hún var fædd árið 1967.

Leit hélt eftir þetta áfram og bættust fleiri björgunarsveitamenn í hóp hinna. Um kl. 21.30. fannst svo maðurinn, eða 4-5 km suður af bílnum. Hann var einnig látinn.

Ekki er unnt að greina frá nafni hinna látnu að svo stöddu.