Eldgos á Fimmvörðuhálsi. Myndin er úr safni. mbl.is/RAX

Eftir Jón Pétur Jónsson

„Það eru ansi góðar hrinur núna,“ segir Haraldur Sigurðsson eldfjallafræðingur í samtali við mbl.is, en hann er nú staddur á Fimmvörðuhálsi ásamt tökuliði og þáttastjórnendum breska bílaþáttarins Top Gear. Hann segir litlar breytingar hafa orðið á gosstöðvunum, þrátt fyrir snarpan skjálfta í gær.

Haraldur segir að hópurinn hafi lent í aftakaveðri á svæðinu í nótt. „Það tók okkur 10 tíma að koma frá Sólheimum og upp á Fimmvörðuháls. Að keyra yfir Mýrdalsjökul með sex trukka, tvo snjóbíla og fjölda manns. Það var mjög erfitt. Nú er þetta eins og best getur verið. Glampandi sólskin, blíða og gos,“ segir Haraldur.

Menn hafi verið komnir í skálann klukkan 4 í nótt og svo hafi verið lagt aftur af stað klukkan sjö. Þeir Top Gear félagar muni taka myndir á svæðinu í dag og svo verði snúið aftur til byggða á morgun.

Dregist saman í einn gíg

Jarðskjálfti, sem mældist 3,7 á Richter, mældist beint undir Eyjafjallajökli í gær. Er þetta mesti skjálfti sem hefur mælst á svæðinu frá því skjálftahrinan hófst í marsbyrjun. Að sögn Haraldar er ekki að sjá að skjálftinn hafi breytt miklu. Hann fylgist vel með óróanum og segir að ekki hafi orðið mikil breyting þar á. Fáir skjálftar mælist öðru hvoru.

Haraldur segir að „gömlu“ gígarnir séu nú dauðir. „Það hefur myndast mikið og fallegt gulgrænt lag af brennisteini á toppnum á þeim. Eins og rjómi á tertu. Svona grænt - alveg sérstakt.“ Hann segir að gosið hafi dregist saman í einn gíg sem sé mjög virkur. „Hraun rennur niður í áttina að Þórsmörk,“ bætir hann við.

Haraldur telur að litlar breytingar muni verða á gosinu á næstunni, en hann tekur það þó fram að nú séu menn aðeins með ágiskanir.

Mikil flugumferð er á svæðinu að sögn Haraldar og þá fer ferðamönnum fjölgandi.

Haraldur hefur verið duglegur að blogga um gosið, en blogg Haraldar má lesa hér.