Margrét Hörn Jóhannsdóttir og Höskuldur Jónsson lentu fyrr í kvöld í öðru sæti í flokki 11 ára og yngri í cha-cha-cha á danskeppninni Junios Dance Festival sem haldin er í Blackpool á Englandi þessa vikuna. 

Um er að ræða eina virtustu danskeppni fyrir börn og unglinga, en keppnin er nú haldin í 53. sinn. Keppt er í tveimur flokkum, annars vegar 6-11 ára og hins vegar 12-15 ára. Keppendur koma frá öllum heimshornum. 

Alls eru um 90 pör skráð til keppni í yngri aldursflokknum, þar af tíu íslensk pör. Þrjú íslensk pör komust í aðra umferð í einsdanskeppninni í dag, en alls komust 50 pör í þá umferð. 

Eitt par komst í undanúrslit í gærkvöldi í flokki 12-13 ára í cha-cha-cha og rumbu. Það voru þau Davíð Bjarni Chiorlanzio og Rakel Matthíasdóttir, en þau eru úr Dansíþróttafélagi Hafnarfjarðar líkt og Margrét og Höskuldur. 

Í gær fór fram landaliðakeppni í eldri aldursflokknum. Þar kepptu sjö lönd, þ.e. Danmörk, Finnland, Úkraína, Bandaríkin, Japan, Bretland og Ísland. Íslenska liðið varð þar í öðru sæti, en alls keppa fjögur pör fyrir hvert lið, tvö lið í sígildum dönsum og tvö í suður-amerískum dönsum. 

Á morgun fer fram landaliðakeppni í yngri aldursflokknum og vínarvalskeppni. Stóra suður-amerísku danskeppnin fer fram á lokadegi keppninnar á föstudag.

Alls taka þátt 14 íslensk pör í eldri aldurshópnum í keppninni í Blackpool og 10 pör í yngri aldurshópnum.