Flugvél Landhelgisgæslunnar flýgur yfir gosstöðvarnar í gær. mbl.is/Árni Sæberg

Talsverður fjöldi ferðalanga lagði leið sína að gosstöðvunum á Fimmvörðuhálsi í gær, að sögn almannavarnadeildar ríkislögreglustjóra. Nokkuð var um að menn virtu ekki kílómeters radíus í kringum gosstöðvarnar og gengju jafnvel yfir nýrunnið hraunið.

„Gos í gossprungunni þar sem gosið hófst hefur dottið niður, en það getur auðveldlega hafist þar á ný og ber fólki að sýna varúð þegar náttúruöflin eru annars vegar.

Skot kom í Hvanná í gærkvöldi og jókst bæði hiti og vatnsmagn í ánni. Sama má segja um Krossá. Miklar gufusprengingar voru í Hvannárgili þar sem vatn rennur niður drögin frá gosstöðvunum.

Enn er nokkuð um að ferðalangar ofmeti eigin getu og farartækja sinna og þurfi að leita ásjár björgunarsveita og lögreglu. Ítrekað er að þeir sem hyggjast fara að gosstöðvunum virði lokanir, fari um svæðið með gát og búi sig í samræmi við veðurspá og aðstæður á svæðinu.

Veðurstofan hefur gert sérstakar veðurspár fyrir Fimmvörðuháls og fyrir daginn í dag segir að á svæðinu verði suðlæg eða breytileg átt,  3-8 m/s og dálítil snjókoma framan af morgni, en síðan stöku él.“