Það gýs úr tveimur gígum á sprungunni, sem opnaðist 31. mars. mbl.is/RAX

Gosvirkni við Fimmvörðuháls hefur haldist óbreytt í dag að sögn Ármanns Höskuldssonar eldfjallafræðings sem staddur var við gosstöðina nú undir kvöld.

Enn er virkni í sprungunni vestan við fyrsta gíginn og ekkert farið að draga úr. „Það rennur heilmikið hraun úr henni ofan í Hvannárgil og við erum búin að vera að skemmta okkur við að horfa á flakkara eins og þeir voru kallaðir í Vestmannaeyjum,“ segir Ármann.  Með því eigi hann við gígbarma sem hlaðast upp og sem hraunið ýtir síðan á þannig að þeir sigla áfram með hrauninu niður í gil.

„Það er búið að vera lærdómsríkt að fylgjast með þessu“, segir Ármann en kveður hins vegar dautt í gamla gígnum.

Lítið hefur verið um fólk á gosslóðum í dag, enda svartaþoka á jöklinum og skyggni lélegt auk þess sem gengið hefur á með éljum.

Að sögn Benedikts Bragasonar, leiðsögumanns hjá Arcanum ferðaþjónustu, hefur því lítið verið um ferðir upp á jökulinn og fyrsta og eina ferð dagsins raunar ekki farin fyrr en núna undir kvöld.

„Það var þoka og hálfgert leiðindaveður á jöklinum í dag og færðin var þung á Mýrdalsjökli. Þá var líka þoka inni á Fimmvörðuhálsi þannig að við hættum bara við. Enda höfum við ekkert að sýna ef við sjáum ekki eldfjallið.“ Fyrir skemmstu hafi hins vegar birt til og þá hafi verið ákveðið að fara með fólk sem ekki hafi gefist upp á að bíða eftir góðu færi. „Það var fínt inn við fjall núna rétt áðan,“ segir Benedikt.