Fleiri konur hafa leitað í Kvennaathvarfið að undanförnu mbl.is/Jim Smart

Aðeins einu sinni í 27 ára sögu Kvennaathvarfsins hafa fleiri konur verið skráðar en á síðasta ári. Í fréttatilkynningu sem Samtök um kvennaathvarf sendu frá sér í gær kemur fram að alls 118 konur og 60 börn dvöldu í athvarfinu árið 2009 og veitt voru tæplega 500 ráðgjafar- og stuðningsviðtöl. Þörfin virðist halda áfram að vaxa því það sem af er ári 2010 hefur aðsókn í viðtöl enn stóraukist.

Fram kemur að erlendar konur hafi allt að því horfið úr Kvennaathvarfinu í kjölfar bankahrunsins, en um mitt síðasta ár fór þeim að fjölga aftur og voru 37% dvalarkvenna árið 2009. Fækkun erlendra kvenna mánuðina eftir bankahrun má líklega skýra með auknu atvinnuleysi og óöryggi í samfélaginu. Fjórðungur ofbeldismanna er af erlendum uppruna.

Konur dvöldu í athvarfinu allt frá einum upp í 73 daga, en að meðaltali 11 daga. Fram kemur að konur fara nú í auknum mæli aftur heim í óbreyttar aðstæður, eða 40% þeirra og hefur sá hópur sennilega aldrei verið jafnstór að því er fram kemur í tilkynningunni.  Að auki luku 20% dvöl án þess að ljóst væri hvert þær færu sem er talsvert hærra hlutfall en undanfarin ár. Reynslan hefur sýnt okkur að talsverður hluti þess hóps fer aftur heim til ofbeldismannsins. Því má reikna með að a.m.k. helmingur dvalarkvenna hafi farið aftur heim í óbreyttar aðstæður og vekur það áhyggjur.

Rúmlega 80% kvenna nefna andlegt ofbeldi meðal ástæðna dvalar og 55% líkamlegt ofbeldi. Um 30% nefna ofsóknir eða morðhótanir og er þá oftast um að ræða ofsóknir af hálfu fyrrverandi eiginmanns eða sambýlismanns eða barnsföður. 20% voru með líkamlega áverka við komu en nærri helmingi fleiri höfðu hlotið líkamlega áverka áður.