Sakborningar í Héraðsdómi Reykjaness þegar dómur var kveðinn upp nýlega. Ómar Óskarsson

Hæstiréttur hefur staðfest úrskurð Héraðsdóms Reykjaness um gæsluvarðhald yfir einum Litháanum, sem dæmdir voru í 5 ára fangelsi fyrir mansal nýlega, verði framlengt þar til dómur fellur í Hæstarétti. Rétturinn stytti þó gæsluvarðhaldstímann til 15. júní en héraðsdómur hafði fallist á kröfu lögreglu um að maðurinn yrði í varðhaldi til 1. júlí.

Fimm Litháar voru nýlega dæmdir í 5 ára fangelsi fyrir mansal en einn Íslendingur, sem einnig var ákærður í málinu, var sýknaður. Litháarnir hafa setið í gæsluvarðhaldi frá því í október og hefur það varðhald ítrekað verið framlengt, síðast um mánaðamótin.

Einn mannanna kærði úrskurð héraðsdóms um framlengingu gæsluvarðhaldsins til Hæstaréttar. Lögreglan vísaði til hættumats greiningardeildar ríkislögreglustjóra til stuðnings kröfu um gæsluvarðhald. Hæstiréttur segir, að í málinu liggi aðeins fyrir stuttur úrdráttur þessa hættumats. Þar komi nafn Litháans ekki fyrir heldur aðeins almennar lýsingar á skipulagðri glæpastarfsemi sem menn frá Litháen séu taldir halda uppi hér á landi og fullyrðing, að meðal annars umræddur maður hafi „komið við sögu lögreglu hér á landi“ og mál sé að finna í „gagnagrunnum lögreglu“ sem sýni þetta.

Litháinn mótmælti því að hann tengist skipulagðri glæpastarfsemi. Hann er fæddur 1986 og sagðist hafa búið hjá móður sinni á Íslandi í um það bil þrjú ár. Vísaði hann til þess að ekki væri í gögnum málsins að finna neinar upplýsingar um ætluð refsiverð brot hans hér á landi og sagðist aldrei hafa gerst sekur um ofbeldisbrot eða nokkur önnur brot ef frá væri talinn mansalsdómurinn.  

Hæstiréttur taldi hins vegar að skilyrðum um gæsluvarðhald væri fullnægt en stytti gæsluvarðhaldstímann eins og áður sagði.