55 milljarða lán til starfsmanna
Lán Glitnis til starfsmanna sinna, og/eða eignarhaldsfélaga í þeirra eigu, námu alls um 55 milljörðum króna þegar þau urðu hæst í september 2008. Þetta kemur fram í umfjöllun rannsóknarnefndarinnar í 3. hefti skýrslunnar um launa- og hvatakerfi bankanna.
Í umfjölluninni kemur fram að ef miðað er við félög sem starfsmaður átti ráðandi hlut í, þ.e. um 20% eignarhlut eða stærri. var heildarlánafyrirgreiðsla Glitnis til starfsmanna og eignarhaldsfélaga þeirra um 35 milljarðar kr. við fall bankans. Til trygginga fyrir a.m.k. þriðjungi þeirra lána stóðu hlutabréf í bankanum sjálfum.
Nefndin hefur aflað ítarlegra upplýsinga um laun og starfskjör stjórnenda bankanna, árangurstengingu launa og kaupréttarsamninga.
Í umfjöllun um launa- og hvatakerfið hjá glitni segir að það veki athygli „að hvorki er getið í ársskýrslu Glitnis árið 2007 um hluta skuldbindinga sem félagið tókst á hendur með ráðningarsamningi við Lárus, alls 550 milljónir kr., né skuldbindingar félagsins vegna bónusgreiðslna til Bjarna Ármannssonar, alls 270 milljónir kr. Einungis er getið þeirrar 300 milljóna króna eingreiðslu sem Lárus fékk við undirritun ráðningarsamningsins og þeirrar 100 milljóna króna greiðslu sem innt var af hendi til Bjarna Ármannssonar,“ segir í úttektinni.
Fram kemur að Glitnir veitti 15 milljarða kr. lán til hlutafjárkaupa í því skyni að hvetja lykilstarfsmenn til að starfa áfram hjá bankanum. Þar af lánaði bankinn fjórtán framkvæmdastjórum og lykilstarfsmönnum bankans alls um 8,1 milljarð í maí 2008.
„Vakin er athygli á því að á aðalfundi Glitnis 20. febrúar 2008 lét Þorsteinn Már Baldvinsson, nýkjörinn stjórnarformaður, þau orð falla að kaupréttarsamningar yrðu ekki gerðir við starfsfólk Glitnis eins og staðan væri. Rannsóknarnefnd Alþingis vekur einnig athygli á lánum sem bankinn veitti stjórnarmanni og framkvæmdastjóra í gegnum eignarhaldsfélög þeirra, KÞG Holding og HG Holding, m.a. til útgreiðslu arðs hjá félögum sem voru í taprekstri. Lánin voru veitt gegn veðum í bréfum í Glitni og virði tryggingaþekju lánsins var um 85% í tilfelli KÞG Holding, en hins vegar einungis 68% í tilfelli HG Holding.
Það vekur athygli rannsóknarnefndar að ítrekað var endursamið um kjör stjórnenda og starfsmanna og þá ávallt þeim til hagsbóta,“ segir í 10. kafla skýrslunnar.
Bent er á að ráðning Lárusar Welding og samþykki á ráðningarkjörum hans fór fram á 35 mínútna löngum stjórnarfundi. Er þetta sagt vekja spurningar um vandaða stjórnarhætti.
„Afgerandi breyting varð á uppbyggingu launa hjá æðstu stjórnendum Glitnis sem og hvatakerfi félagsins á tímabilinu 2004–2008. Umbreytingin var til þess fallin að auka verulega áhættusækni stjórnenda,“ segir í umfjöllun rannsókanrnefndarinnar um launa- og hvatakerfið sem við lýði var hjá Glitni.
