Minningarathöfn um flugslysið fer fram í Patreksfjarðarkirkju annað kvöld. bb.is

Hluttekningarbók hefur verið komið fyrir í Fjölvali á Patreksfirði vegna hins hörmulega flugslyss er varð í Smolensk í Rússlandi á laugardag þar sem pólsku forsetahjónin og helstu ráðamenn létu lífið.

Bókin mun liggja frammi í versluninni Fjölval fram á laugardag. Öllum þeim sem vilja veita pólsku þjóðinni hluttekningu er bent á að skrifa nafn sitt í bókina. Bókin var formlega opnuð. Formáli bókarinnar hljóðar svo: „Við undirrituð vottum aðstandendum þeirra sem fórust í hinu hörmulega flugslysi laugardaginn 10. apríl 2010 í Smolensk í Rússlandi, innilegustu samúð okkar og pólsku þjóðinni allri. Megi almáttugur Guð koma til ykkar með blessun sína og huggun í þessari miklu sorg.“

Á pólsku hljóðar formalin svona: „My niżej podpisani łączymy się w bólu z rodzinami i bliskimi tych którzy zginęli tragicznie w katastrofie polskiego samolotu prezydenckiego w sobotę 10 kwietnia 2010 roku w Smoleńsku, oraz z całym Polskim Narodem. Niech Bóg Wszechmogący wspiera Was Swoim Błogosławieństwem w tych bolesnych chwilach. Z przyjacielskimi pozdrowieniami.“

Framámenn í Vesturbyggð skrifuðu fyrstir í bókina er hún var formlega opnuð í dag. Má þar nefna sr. Leif Ragnar Jónsson sóknarprest í Vesturbyggð, sem flutti huggunarorð til viðstaddra, Úlfar Lúðvíksson sýslumaður, Úlfar Thoroddsen forseti bæjarstjórnar, Ragnar Jörundsson bæjarstjóri, Jónas Sigurðsson aðstoðar yfirlögregluþjónn og Skjöldur Pálmason framleiðslustjóri Odda. Þá má geta þess að Elzbieta Kowalczyk flutti nokkur orð á pólsku til samlanda sinna.

Annað kvöld kl. 20.00 fer fram minningarathöfn í Patreksfjarðarkirkju vegna þeirra Pólverja sem fórust í slysinu. Fólk er hvatt til að mæta til minningarathafnarinnar og sýna samhug í verki.