Lárus Welding fyrrverandi forstjóri Glitnis og Davíð Oddsson, fyrrverandi seðlabankastjóri á blaðamannafundi í Seðlabankanum eftir að ríkið hafði ákveðið að kaupa 75% hlut í bankanum þann 29. september 2008 mbl.is/kristinn

Fulltrúar Landsbankans lögðu til við stjórnvöld í september 2008, að bankinn og Glitnir yrðu sameinaðir. Þessar tillögur lögðust illa í ráðherra og er haft eftir Halldóri J. Kristjánssyni, þáverandi bankastjóra Landsbankans, að sér hafi virst sem ráðherrar hafi litið svo á að Landsbankinn hygðist nýta sér þær sérstöku aðstæður sem uppi voru til þess að yfirtaka Glitni á kostakjörum.

Við skýrslutöku lýsti Davíð Oddsson, þáverandi seðlabankastjóri, því að þegar þessi tillaga barst hefði hann verið inni á skrifstofu sinni ásamt Geir H. Haarde, þáverandi forsætisráðherra. Eftir að hafa lesið tillöguna yfir hefði Geir kallað hana „vitleysu“. Síðan hefði símtal borist frá Halldóri J. Kristjánssyni sem hefði verið að spyrjast fyrir um viðtökur tilboðsins.

Davíð lýsti samtali sínu og Halldórs með eftirfarandi hætti: „Ég get fengið  ríkisstjórnina og bankastjórnina til að samþykkja þetta með einu skilyrði, þessa hugmynd ykkar. Hann var mjög kátur og sagði: Hvað er það? Það er að ég [...] komist í stjórn Blómavals. Þá sagði hann: Er þetta svona vitlaust?
Já, þetta er svona vitlaust. Og svo lagði ég á.“