Geir H. Haarde, fyrrverandi forsætisráðherra, sagði við skýrslutöku hjá rannsóknarnefndinni að skattalækkanir undanfarin ár hafi „kannski ekki alltaf verið nákvæmlega heppilega tímasettar.“ Hann sagði  kosningabaráttuna 2003 með mjög „“furðulegum hætti“ hafa snúist upp í „kapphlaup um skattalækkanir“. Þetta sé hins vegar ekki skýringin á því að bankarnir „fóru á hliðina“.

Skýrsluhöfundar segja að þarna viðurkenni ráðherrann fyrrverandi að þau loforð sem gefin voru í stefnuyfirlýsingu ríkisstjórnarinnar frá 2003 um skattalækkanir hafi verið gefin fyrst og fremst vegna samkeppni flokka um atkvæði í aðdraganda kosninganna 2003.

Geir segir að Framsóknarflokkurinn hafi riðið á vaðið sem varð til þess að allir hinir flokkarnir, þ.á m. Sjálfstæðisflokkurinn, taldi að það væri ekki hægt að „láta þá eiga eitthvað inni hjá sér í þessu og því miður varð þarna ákveðið ábyrgðarleysi hjá öllum flokkum, því var nú ágætlega lýst af núverandi fjármálaráðherra [Steingrími J. Sigfússyni] á þeim tíma sem sagðist ekki vilja taka þátt í svoleiðis ábyrgðarleysi, hann gerði það alveg hreinskilnislega og hann fékk nú svona bágt fyrir það hjá sumum en mér fannst það bara heiðarlegt af honum að tala þannig. [...] Þetta held ég að geti gefið svona ákveðinn bakgrunn fyrir efnahagsuppsveiflunni og því öllu saman en ég held hins vegar ekki að þetta sé skýringin á því af hverju bankarnir fóru á hliðina.“

Skýrsluhöfundar segja að með þessu viðurkenni ráðherrann fyrrverandi að þau loforð sem gefin voru í stefnuyfirlýsingu ríkisstjórnarinnar frá 2003 um skattalækkanir hafi verið gefin fyrst og fremst vegna samkeppni flokka um atkvæði í aðdraganda kosninganna 2003.

„Einnig segist hann hafa gert sér grein fyrir því að tímasetning hafi verið óheppileg vegna stöðu efnahagsmála. Lækkun tekjuskatts var fylgt eftir með lækkun virðisaukaskatts á matvælum og fleiri vörum skömmu fyrir kosningar 2007, þrátt fyrir að stuttu áður hafi verið talin ástæða til að draga úr fyrirhuguðum tekjuskattslækkunum vegna viðvarandi þenslu í hagkerfinu.“

Efnahags- og framfarastofnunin, Alþjóðagjaldeyrissjóðurinn og Seðlabanki Íslands, eru á einu máli um að tímasetning skattalækkana á árunum 2005 til 2007 hafi verið óheppileg. Þessar skattalækkanir hafi dregið úr aðhaldi og stuðlað að þenslu.

Um þetta er fjallað í undirkaflanum Skattastefna í 1. bindi skýrslunnar, bls. 126-129.