Ef neytendur eiga bótakröfur á hendur þeim, sem ákærðir eru vegna brota eða vanrækslu við efnahagshrunið, þurfa þeir ekki að stefna þeim. Þetta kemur fram á vef talsmanns neytenda, Gísla Tryggvasonar.

Eftir því sem þar kemur fram geta neytendur samkvæmt lögum um sérstakt réttarfarshagræði í sakamálum lýst kröfum við handhafa ákæruvalds ef þeir vilja gera skaðabótakröfur eða aðrar kröfur gegn þeim, sem kunna að bera refsiábyrgð á tjóni neytenda.

„Nauðsynlegt er að slík krafa sé vel útfærð og komi fram við rannsóknaraðila eða ákæranda - áður en ákæra er gefin út. Sem dæmi má nefna tjón neytenda í kjölfar hruns bankanna eða vegna misferlis eða vanrækslu - sem sætir ákæru. Þetta geta neytendur gert með því að setja fram rökstuddar kröfur við handhafa ákæruvalds - án þess að höfða sjálfir sérstök dómsmál,“ segir m.a. á vef talsmanns neytenda.

Sem dæmi um hugsanlega kröfuhafa, komi til þess að sakamál verði höfðað gegn þeim sem bera ábyrgð, nefnir Gísli lántakendur sem goldið hafa misferlis og annars atferlis lánveitenda og eigenda þeirra í aðdraganda hruns og jafnvel eftir efnahagshrun í október 2008, hluthafar sem tapað hafa áhættufé vegna ráðstafana (raunverulegra) stjórnenda hlutafélags fyrr og síðar, sjóðfélagar peningamarkaðssjóða vegna ráðstafana stjórnenda þeirra sjóða fyrir og í kringum bankahrun haustið 2008 og viðsemjendur bílalánafyrirtækja vegna gengislánaskilmála í upphafi og undanfarið vegna fullnustuúrræða sem fyrirtækin hafa leyft sér að beita án atbeina fulltrúa opinbers valds - ekki síst eftir hrunið 2008.