Ástæða var til að bankastjórn Seðlabanka Íslands aflaði glöggra upplýsinga um hvernig Landsbankinn nýtti þá fjármuni sem komu inn á Icesave reikninga útibúsins í London í fjárstýringu sinni og þá sérstaklega hvort þeir væru í einhverjum mæli fluttir til Íslands eða notaðir í tengslum við fjármögnun höfuðstöðva bankans á Íslandi. Þetta segir rannsóknarnefnd Alþingis. Bankinn hafi hins vegar ekki brugðist við ábendingu breska fjármálaeftirlitsins í mars 2008.

Þetta kemur fram í 18. kafla 6. bindis skýrslu rannsóknarnefndarinnar. Við skýrslutöku hjá rannsóknarnefndinni kom fram hjá bankastjóra
Seðlabanka Íslands að það hefði fyrst verið eftir mitt ár 2008 sem bankastjórnin gerði sér grein fyrir að þeir peningar sem komu inn á Icesave reikningana væru í einhverjum mæli fluttir heim til Íslands.

Hins vegar bendir nefndin á að tveir seðlabankastjóranna áttu með bankastjóra Seðlabanka Bretlands í mars 2008 höfðu fulltrúar breska seðlabankans lýst því að þeir teldu að innlán sem safnað væri í Bretlandi væru meira og minna notuð til þess að fjármagna hraðan vöxt útlána á Íslandi. Í minnisblaði Seðlabanka Íslands um fundinn er þetta nefnt í framhaldi af því að seðlabankastjórarnir töldu Bretana ekki hafa nægar upplýsingar til þess að  meta rétt stöðu íslensku bankanna.

Nefndin segir að í því sambandi hlaut að skipta máli að fulltrúar Seðlabanka Íslands gætu á grundvelli fyrirliggjandi upplýsinga brugðist við og upplýst forráðamenn Seðlabanka Bretlands um það hver væri raunin um notkun þessara fjármuna.

Einnig er bent á að þegar komið var fram í mars 2008 hófst útstreymi af heildsöluinnlánum útibúsins og því líklegt að þeir fjármunir sem komu inn á Icesave hafi að stærstum hluta verið notaðir til að mæta því útstreymi. Þar var einnig um að ræða verulega fjármuni með tilliti til möguleika bankans til að mæta útgreiðslum ef áhlaup yrði gert á Icesave reikningana.