Lögreglumenn fluttu eintök af skýrslunni í Alþingishúsið í dag. mbl.is/Halldór Kolbeins

„Rannsóknarskýrslan er í aðeins minna broti en A4 og er í mjúku bandi. Alls eru þetta ekki nema tvö þúsund blaðsíður og í níu bindum, sem bundin eru saman. Þannig að hvert bindi er á bilinu 200-250 blaðsíður sem er eins og lítil kilja, “ segir Bryndís Loftsdóttir, vörustjóri íslenskra bóka hjá Eymundsson. Hún var stödd á vörulager Forlagsins úti á Fiskislóð þegar blaðamaður mbl.is náði tali af henni. 

Sagðist hún giska á að bindin níu séu alls um 20 sm á breidd og vegi samtals 2,5 kg. „Fyrirfram hafði ég efasemdir um að selja ætti rannsóknarskýrsluna í Leifsstöð, en eftir að hafa séð skýrsluna tilsýndar sýnist mér fólk fara létt með að hafa hana í handfarangri. Hún er nefnilega minni en ég held að margir hafi haldið.“

Að sögn Bryndísar ríkir mikil spenna á vörulagernum vegna útkomu rannsóknarskýrslunnar. „Hér eru öryggisverðir út um allt til þess að gæta skýrslunnar og starfsmenn fá aðeins að afgreiða pantanir í innsigluðu rými,“ segir Bryndís og bætir við að afgreiðslan og eftirvæntingin og stemningin í tengslum við útkomu rannsóknarskýrslu Alþingis slái Harry Potter út og þá sé mikið sagt.  

„Á slaginu kl. 10.15 verður hliðið opnað og þá getum við byrjað að fylla bílana. Það lítur út fyrir að öll afgreiðsla geti gengið snurðulaust fyrir sig þegar hliðin opna,“ segir Bryndís og tekur fram að fyrstu eintökin verði væntanlega ekki komin í búðir Eymundssonar í Austurstræti og á Skólavörðustíg. 

„Við munum einnig leggja mikla áherslu á að koma bókum sem fyrst til  Akraness, Ísafjarðar og Akureyrar með flugi,“  segir Bryndís. Aðspurð segist hún eiga von á því að um þúsund eintök af rannsóknarskýrslunni fari  í dreifingu í búðum Eymundssonar í dag, en von sé á fleiri eintökum á næstu dögum. 

„Það lítur út fyrir að skýrslan eigi að vera til í flestum búðum og efþað verður þurrð í einhverri búð þá ætti það bara að vera í einhverja klukkutíma,“ segir Bryndís.

Mikill áhugi hefur verið meðal almennings á rannsóknarskýrslunni og sem dæmi nefnir Bryndís að Eymundsson hafi selt 200 einstök af skýrslunni í forsölu á netinu.