Robert Tchenguiz. ANDRE CAMARA

Stærsti skuldari í bönkunum í lok árs 2007 og í lok september 2008 er Robert Tchenguiz með 1,2 milljarða evra í lok árs 2007 og 2,1 milljarð evra við fall, sem er nokkurn veginn það sama og hóparnir sem Tchenguiz myndaði út frá 20% lágmarkseignarhaldi. Þetta er meðal þess sem kemur fram í 9. bindi skýrslunnar um krosseignatengsl og útlán bankanna til tengdra aðila.

Í lok árs 2007 er Jón Ásgeir í öðru sæti með tæpa 1,2 milljarða evra, næstum jafn mikið og Tchenguiz en við fall voru samanlagðar skuldir Jóns Ásgeirs undir milljarði evra og skipaði hann þá 3. sætið. Ólafur Ólafsson fer úr 3. sætinu 2007 með 670 milljónir evra í 2. sætið við fall með 1,1 milljarð evra sem er næstum tvöföldun milli ára.

„Einstaklingar sem tengjast Jóni Ásgeiri fjölskylduböndum færast ofar á listann sé miðað við vegnar skuldir félaga þeirra frekar en hóp myndaðan út frá 20% lágmarkseignarhaldi, segir í skýrslunni.

Foreldrar Jóns Ásgeirs, Ása K. Ásgeirsdóttir og Jóhannes Jónsson, eru í 5. og 7. sæti við lok árs 2007 og í 6. og 7. sæti við fall. Eiginkona Jóns Ásgeirs, Ingibjörg S. Pálmadóttir, er í 6. sæti 2007 en 9. sæti 2008. Í skýrslunni segir að það sem hér séu skuldir lagðar saman miðað við eignarhlut viðkomandi er hægt að leggja þær saman því eignarhlutirnir skarast ekki.

„Gervimaður í útlöndum"

„Hjónin er hægt að tengja saman og skoða sem einn aðila. Ef heildarútlán til Jóns Ásgeirs og Ingibjargar eru lögð saman nema heildarskuldir þeirra meira en skuldir Robert Tchenguiz í lok árs 2007, eða rúmum 1,7 milljörðum evra, en við fall námu heildarskuldir þeirra hjóna tæpum 1,3 milljörðum evra, sem er meira en skuldir Ólafs Ólafssonar sem er í 2. sæti. Gervimaður útlönd, þ.e. óþekkt erlent eignarhald, stendur fyrir skuldir að upphæð rúmar 320 milljónir evra í lok árs 2007 og rúmar 290 milljónir evra við fall en það skipar þeim aðilum í 14. og 15. sæti," segir í þessum hluta skýrslunnar.

Í lok september 2008 eru skuldir Björgólfs Guðmundsson í bönkunum 517 milljónir evra, jafnvirði 75 milljarða króna, og skuldir Björgólfs Thors Björgólfssonar 481 milljónir evra, eða um 70 milljarðar króna.

Jón Ásgeir með stærsta fyrirtækjahópinn

Í 9. bindi skýrslunnar eru einnig teknir saman stærstu skuldahópar tengdir einstaklingum. Er þá miðað við að einstaklingur eigi að lágmarki 20% beint og óbeint í fyrirtækjum til að þau falli í hóp viðkomandi. Samkvæmt þessari samantekt trónir Jón Ásgeir Jóhannesson á toppnum í lok árs 2007 með heildarútlán sem nema rúmum 200 milljörðum króna, eða 2,2 milljörðum evra á gengi lok árs 2007. Á eftir honum koma bræðurnir Lýður og Ágúst Guðmundssynir með álíka mikla heildarskuld, með 121 milljarða króna á mann. Fjöldi lögaðila, eða fyrirtækja er tengdust þá Jóni Ásgeiri voru 75, og 27 fyrirtæki sem tengdust Bakkavarar-bræðrum.

Í fjórða sæti yfir stærstu skuldahópa tengda einstaklingum kemur Robert Tchenguiz með 11 fyritæki tengd sér og skuldir upp á 1,2 milljarða evra. Björgólfur Guðmundsson er í 5. sæti með rúman milljarð evra og 52 fyrirtæki honum tengd, Björgólfur Thor Björgólfsson kemur næstur með 846 milljónir og 47 fyrirtæki tengjast honum. Í næstu sætum koma Ólafur Ólafsson (49 fyrirtæki) Pálmi Haraldsson (20 fyrirtæki), Jóhannes Kristinsson (19 fyrirtæki), Magnús Kristinsson (38 fyrirtæki) og í 11. sæti á þessum lista kemur „gervimaður í útlöndum" aftur við sögu, þ.e. óþekktur einstaklingur í útlöndum, með alls 45 milljarða skuldir í bönkunum í lok árs 2007 og tengsl við 372 fyrirtæki í landinu.

Þessa skuldahópa má sjá nánar í töflum 18 og 19 í 9. bindi skýrslunnar, þar sem fjallað er um krosseignatengsl og útlán bankanna til tengdra aðila.