Björn Ingi Hrafnsson, fyrir miðju, að baki þeim Bjarna Ármannssyni og Björgólfi Guðmundssyni. mbl.is

Í skýrslu rannsóknarnefndarinnar segir að svo virðist sem íslenskir stjórnmálamenn hafi ekki þegið boðsferðir frá bönkunum í miklum mæli. Þó eru tveir nefndir sérstaklega, þeir Björn Ingi Hrafnsson, fv. borgarfulltrúi og varaþingmaður, og Gísli Marteinn Baldursson borgarfulltrúi, sem fóru í veiði og sátu veislur í boði bankanna.

Þá fór Bjarni Benediktsson, formaður Sjálfstæðisflokksins, í einkaþotu á vegum Glitnis í golfferð til Skotlands 2007, en Bjarni var á þeim tíma stjórnarformaður N1. Þrír yfirmenn Glitnis á þeim tíma voru í þeirri ferð, m.a. Einar Örn Ólafsson, núverandi forstjóri Skeljungs. Einnig voru í þessar flugferð Hermann Guðmundsson, forstjóri N1, og Hjörleifur Jakobsson, forstjóri Kjalar, sem og eigendur BYGG, þeir Gunnar Þorláksson og Gylfi Héðinsson.

Í skýrslunni er tekið fram að upplýsingar úr farþegalistum með einkaþotum séu mjög ófullkomnar og algengt að á listunum standi „unknown passenger" eða óþekktur farþegi.

Björn Ingi Hrafnsson flaug til London, gisti á Radisson Edwardian hótelinu í byrjun febrúar 2007 og var í veislu á Claridge's Hotel í boði Kaupthing Singer & Friedlander. Björn Ingi veiddi líka í boði Glitnis í Laxá í Leirársveit í júlí sama ár, sem stjórnarformaður Orkuveitunnar.

Gísli Marteinn Baldursson flaug til Rússlands í boði Glitnis, var veislustjóri þar í frægri laxveiðiferð, eins og það er orðað í skýrslunni, og veiddi í ánni Panoi.

Í siðferðiskafla rannsóknarskýrslunnar er farið yfir styrki bankanna til stjórnmálamanna og stjórnmálasamtaka. Yfirlit yfir styrkina eftir bönkum má sjá í 8. bindi skýrslunnar á bls. 164-170.

Bjarni Benediktsson. mbl.is

Gísli Marteinn Baldursson.