Héraðsdómur Reykjavíkur hefur dæmt karlmann á 23. aldursári í tíu mánaða fangelsi fyrir að ógna starfsmanni matvöruverslunar með sprautunál og hóta að smita hana af HIV ef hún léti ekki fjármuni af hendi. Einnig var hann sakfelldur fyrir innbrot og þjófnaði.

Ránið framdi maðurinn 20. febrúar sl. Hann gekk inn í verslun 10/11 við Álfheima í Reykjavík og ógnaði starfsstúlku með sprautunálinni. Hann komst komst á brott með 28 þúsund krónur.

Maðurinn framdi fleiri brot í febrúar, nánar tiltekið 21. og 21. febrúar. Þá braust hann inn í bifreið við Kleppsveg og stal m.a. úr henni handfrjálsum búnaði, geislamæli og hleðslutækjum. Sama dag braust hann inn í íbúðarhúsnæði við Laufásveg og stal þaðan DVD-spilara. Lögregla greip hann hins vegar glóðvolgan og handtók á staðnum.

Daginn eftir reyndi hann aftur innbrot, nú í fjölbýlishús við Brautarholt. Maðurinn fór inn í tvær íbúðir og leitaði verðmæta án árangurs. Húsráðendur komu að honum og héldu þar til lögregla mætti á vettvang.

Maðurinn játaði brot sín skýlaust. Hann á að baki sakarferil frá árinu 2003, en þá var honum veitt ákærufrestun, skilorðsbundið í 2 ár, fyrir þjófnað. Tveimur árum síðar var ákvörðun um refsingu frestað skilorðsbundið til tveggja ára fyrir tilraun til ráns og brot gegn valdstjórninni. Með dómi 3. febrúar 2006 var honum gert að sæta fangelsi í 45 daga, skilorðsbundið í 2 ár, fyrir hylmingu og þjófnað. Þá var honum, með dómi kveðnum upp 28. janúar 2008, gert að sæta fangelsi í 3 mánuði, skilorðsbundið í 2 ár, fyrir gripdeild.

Auk þess hefur maðurinn hlotið sektardóma fyrir umferðarbrot og fíkniefnabrot.