Þingmenn Hreyfingarinnar, Birgitta Jónsdóttir, Margrét Tryggvadóttir og Þór Saari. mbl.is

Þingmenn Hreyfingarinnar fóru fram á það við upphaf þingfundar að umræða um skýrslu rannsóknarnefndar Alþingis yrði frestað, enda hafi þingmenn ekki getað kynnt sér efni hennar á svo skömmum tíma. Þeim var bent á að ekki væri um lokaumræðu að ræða.

Steinunn Valdís Óskarsdóttir, starfandi formaður þingflokks Samfylkingarinnar, benti þingmönnum Hreyfingarinnar á, að fyrirkomulagið hefði verið rætt í forsætisnefnd og á fundum formanna þingflokkanna. Engar athugasemdir hefðu komið fram þar. Hún tók þá fram að umræðan um skýrsluna haldi áfram á morgun og jafnvel fimmtudag.

Birgitta Jónsdóttir, formaður Hreyfingarinnar, sagði þá að fyrirkomulagið hefði ekki legið fyrir fyrr en á síðasta fundi þingflokksformanna. Áður hefði verið gert ráð fyrir umræðunni á miðvikudegi. Hún sagðist ekki hafa reynt að malda í móinn enda lært af reynslunni að örflokkurinn Hreyfingin hafi ekki mikið vægi.

Gunnar Bragi Sveinsson, þingmaður Framsóknarflokks, þakkaði hins vegar fyrir tækifærið til að ræða málin. Hann sagði ljóst að ekki væri um að ræða síðustu umræðuna um skýrsluna og margir þingmenn sætu nú sveittir við lestur á skrifstofum sínum. Þeir hefðu margir hverjir í hyggju að ræða hana á morgun.

Skotgrafahernaður hafinn?

Lilja Mósesdóttir, þingmaður Vinstri grænna, kom einnig upp í ræðustól. Hvatti hún þingmenn Sjálfstæðisflokks, Samfylkingar og Framsóknarflokks til að vera í salnum á meðan umræðu stendur, enda sé ábyrgð þeirra mikil.

Þetta mislíkaði Ragnheiði Elínu Árnadóttur, þingmanni Sjálfstæðisflokks, og taldi um skotgrafahernað að ræða. Hún hvatti á móti alla þingmenn til að taka þátt í umræðunni á sínum forsendum. Jafnframt að þingmenn sýni umræðunni þá virðingu sem hún á skilið.

Steinunn Valdís virtist einnig ósátt við orð Lilju. Hún sagði það skyldu allra þingmanna að vera viðstaddir umræðuna, hvar í flokki sem þeir standa. Enginn flokkur sé undanskilin.

Lilja Mósesdóttur mbl.is