Erlendir fjölmiðlar hafa sýnt gosinu áhuga. Árni Sæberg

Eldgosið í Eyjafjallajökli kann að lama flugumferð yfir öllum Noregi í fyrramáli, leggi öskuna af gosinu yfir landið. Þetta kemur fram á fréttavef Aftenposten, sem segir gervihnattamyndir benda til þess að ösku frá Íslandi muni leggja yfir Norðurlöndin í nótt og fyrramálið.

Er þetta í samræmi við fréttir sem nýlega bárust frá Flugstoðum, en þar kom fram að líklegt megi telja að öskufallið leggi yfir Norðurlöndin og að flug frá Íslandi til Norðurlanda liggi niðri til hádegis á morgun. Þegar er raunar búið að leggja af allt flug yfir Norður-Noregi.

„Það síðasta sem við fréttum er að öskuna leggur austur yfir Ísland og þess vegna erum við í viðbragðsstöðu,“ hefur Aftenposten eftir Jens Petter Duestad hjá flugumferðastjórninni í Avinor.

Flugumferðastjórn taki stöðugt á móti nýjum gervihnattamyndum frá veðurfræðingum í London sem séu sérfræðingar í þessum málum. Myndirnar gefi vísbendingu um hvaða áhrif gosið muni hafa á flugumferð yfir Noregi.