Vatn flæðir um allt við Markarfljót. Ómar Óskarsson

Enginn truflun hefur orðið á fjarskiptum þrátt fyrir hlaup í Markárfljóti í kjölfar eldgossins sem hófst í Eyjafjallajökli í nótt. Þau fyrirtæki sem eiga ljósleiðara og sæstreng á svæðinu hafa þó fylgst vel með.  

Fyrirtækið Míla sendi t.a.m. í dag frá sér tilkynningu þar sem farið er þess á leit við verktaka að þeir rjúfi ekki jörð í nánd við ljósleiðarahringinn nema að höfðu samráði við Mílu.

„Þetta var einfaldlega öryggisráðstöfun hjá okkur,“ segir Eva Magnúsdóttir, forstöðumaður hjá Mílu. „Við viljum ekki að það sé verið að gera jarðrask við ljósleiðarahringinn án samráðs við okkur.“

Hún segir neyðarstjórn fyrirtækisins hafa fylgst vel með gosinu og að Míla hafi undirbúið sig og varið þau sambönd viðskiptavina sinna sem mögulegt er.   „Svo erum við búin að undirbúa uppsetningu varasambanda. Þannig að við höfum verið á vaktinni í dag.“

Sæstrengur Farice fer frá landi um 15 km vestan við Markarfljót og er því ekki í hættu að sögn Guðmundar Gunnarssonar, framkvæmdastjóri Farice. „Við hins vegar gerðum hins vegar allar ráðstafanir sem við gátum með allt í kring ef hlaupið hefði orðið eitthvað stærra,“ segir Guðmundur

Þegar verið var að undirbúa lagningu sæstrengsins á sínum tíma þá stóð til að leggja hann austar en gert var. „Jarðvísindamenn hins vegar ráðlögðu okkur að fara vestar með hann beinlínis út af þessu.“