Ólafur Eggertsson bóndi á Þorvaldseyri undir Eyjafjöllum. mbl.is/Helgi Bjarnason

„Ég er hér að mjólka mínar kýr,“  segir Ólafur Eggertsson, bóndi á Þorvaldseyri og oddviti í hreppnum, sem ásamt syni sínum fékk leyfi klukkan sjö í morgun til þess að halda heim á bæ og sinna skepnum. Segir hann skepnurnar rólegar þrátt fyrir jarðhræringarnar í nótt. „Þær mjólka sem aldrei fyrr. Þær eru mjög afslappaðar og fínar.“

Segist hann gera ráð fyrir að þeir verði um tvær klukkustundir að sinna skepnunum og því ljúki þeim verkum um níuleytið. „Ég hef ekki fengið boð um það að yfirgefa svæðið aftur þrátt fyrir vatnavexti. Nú er þetta norðanmegin við jökulinn, en ég er sunnanmegin við jökulinn og mér skilst að það sé engin aukning í ám hér í kringum mig. Þannig að ég hef ekki verið látinn vita af því að fara til baka.

Ætli menn séu ekki þessa stundina einmitt að finna út úr því hvar nákvæmlega þetta er og hvar hættusvæðin eru,“ segir Ólafur og tekur fram að þeir feðgar séu örugglega öruggari núna sunnanmegin við jökulinn en í nótt. 

„Skjálftarnir í nótt voru ískyggilega nálægt bænum, bara rétt fyrir ofan hér í hlíðinni við jökulbrúnina. Þetta leit illa út á tímabili,“  segir Ólafur, sem ásamt fjölskyldu sinni yfirgaf bæinn um miðja nótt, en þau vöknuðu við skjálftana upp úr klukkan eitt. Þau voru skráð á fjöldahjálparstöð Rauða kross Íslands í grunnskólanum á Hvolsvelli áður en þau leituðu húsaskjóls í Varmahlíð og fengu að gista þar.